Բոլոր նրանք, ովքեր խոշտանգումների, բիրտ վերաբերմունքի են արժանացել, ամենևին չպետք է մտահոգվեն, որ այդ ամենը կարող է հայտնի դառնալ, և խուսափեն այդ մասին բարձրաձայնելուց: «Առաջին լրատվական»-ի հետ զրույցում «Ընդդեմ իրավական կամայականության» ՀԿ նախագահ, Մարդու իրավունքների առաջին պաշտպան Լարիսա Ալավերդյանը նշեց, որ իրենց իսկ կազմակերպությունը զբաղվում է այդ հարցով, և դա անում են գաղտնի, բայց եթե իմանում ենք՝ ինչպես, որտեղ է նման բան պատահել, այս այն մարմինների հետ անց ենք կացնում այլ աշխատանք, իսկ սա պահանջում է շատ կազմակերպությունների ամենօրյա աշխատանք: Ալավերդյանը նշեց, որ իրենք մշտապես ուշադրության կենտրոնում են պահում նաև Ադրբեջանում գերի ընկնող մեր հայրենակիցների հարցը:
«Եթե Ադրբեջանում ընդունված ձև են համարում 77 տարեկան անձին բառիս բուն իմաստով ֆիզիկական խայտառակ խոշտանգումների ենթարկել, բացի այդ՝ ինչ-որ ներարկումներ անել, դատաբժշկական քննությունը շարունակվում է, ավելին չեմ կարող ասել, ապա սա նշանակում է միջնադարյան մեթոդների վերադարձ տարածաշրջան, մեր կազմակերպությունը ստանձնել է պարտականություն՝ գործը հասցնել մինչև ՄԻԵԴ: Պահանջվում է ևս մի գործողություն, դա էլ ենք սկսել, դիմել ենք Ադրբեջանին, բայց քանի որ նորմալ կապ չկա, դա անում ենք այլ՝ միջազգային կազմակերպությունների միջոցով»,- ասաց նա:
Ալավերդյանի խոսքով՝ եթե մեկ ամսում արձագանք չստանան, ինչն ակնկալվող արդյունք է, ապա արդեն իրավունք ունեն շարժվել առաջ՝ դեպի Եվրոպական դատարան՝ հենց այդ հիմքով: Անդրադառնալով գլխավոր դատախազ Գևորգ Կոստանյանի՝ կաշառքն ու կոռուպցիան ոլորտից բացառելու հայտարարությանը՝ Ալավերդյանը նախ ընդգծեց, որ երկար տարիներ Գևորգ Կոստանյանը հանդես է գալիս՝ որպես Հայաստանի ներկայացուցիչ ՄԻԵԴ-ում, և իրեն ավելի քան որևէ մեկին հայտնի է, որ անօգնական որոշ մերժումները երկրի կողմից ավելի վատ տպավորություն են թողնում, քան եթե պետությունը շատ արագ վերացներ այդ երևույթը:
«Ես միշտ որպես կանոն նոր անձին դրական լիցքերով եմ վերաբերվում, մի բան պիտի նշեմ սակայն, մենք կցանկանայինք, որ խոսքերը դառնային գործ՝ օր առաջ, ժամ առաջ, տեսանելի լինեին հասարակության համար: Հայաստանի նման երկրում, որտեղ ամեն ինչ անձնավորված է, այլ դեպքերում անձից ենք, չէ՞, խոսում… եթե քաղաքական պաշտոն է, իհարկե, անձերից շատ բան է կախված: Քաղաքական կամք որ ասում ենք, ումի՞ց ենք ակնկալում, հենց պաշտոնատար անձից»,- ասաց նա:
Ալավերդյանը նշեց, որ եթե գլխավոր դատախազը կարողանա որոշ անգամներ դիմադրելով իրենից ավելի վեր կանգնած քաղաքական կամքի կրողին, կարողանա համոզել, կամ ապացուցել, որ սա է ճանապարհը իրական զարգացման, ոչ թե քողարկումը, կարող է և հաջողակ լինի:
Մանրամասները՝ տեսանյութում: