«Թրանսփարենսի ինտերնեշնլ» հակակոռուպցիոն կազմակերպության ուսումնասիրության արդյունքների համաձայն՝ պետական մարմինների կողմից կատարվող գնումների 67 տոկոսը կատարվում է մեկ անձից: Սա նշանակում է՝ իրական մրցակցությունն այդ ոլորտում բացակայում է: Ուսումնասիրությունը կատարվել է 2011-2013 թվականների ընթացքում:
«Թրանսփարենսի ինտերնեշնլ» հակակոռուպցիոն կազմակերպության տնօրեն Վարուժան Հոկտանյանը մեր հարցին՝ կենտրոնի ուսումնասիրությունները իրավական որևէ հետևանք ունենո՞ւմ են, պատասխանեց. «Տեսականորեն պետք է ունենան, սակայն որևէ հետևանքներ չեն եղել: Երբ որ նկատվել է փոխկապակցածություն, գնումների դեպքում այդ ամենը չի ուսումնասիրվել: Շոուի նման եղան մի քանի դեպքեր՝ Հանրային գրադարան և այլն: Հիմնականում ուսումնասիրություններ արվում է, երբ որ մսխվում են շատ մեծ գումարներ»: Նրա խոսքերով՝ չի եղել, որ դատախազությունն ու ոստիկանությունը ուսումնասիրեն փոխկապակցվածության դեպքերը. «Ես համենայնդեպս տեղյակ չեմ, որ այդպիսի դեպքեր կան»:
Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը օրերս մեր լրատվամիջոցին տված հարցազրույցում հայտարարեց, որ էական առաջընթաց կա պետական գնումների գործընթացում մրցակցության առումով, և որ 100-ավոր դեպքեր են իրենք բացահայտել:
Պետական գնումների գործընթացի մոնիտորինգ իրականացրած «Թրանսփարենսի ինտերնեշնլ» հակակոռուպցիոն կազմակերպության տնօրեն Վարուժան Հոկտանյանը մեր հարցին՝ համաձա՞յն է, որ ՏՄՊՊՀ-ին հաջողվել է մրցակցային դաշտ ստեղծել գնումների գործընթացում, այսօր պատասխանեց. «Մեր հետազոտությունների արդյունքները դա չեն վկայում, չգիտեմ»:
Կառավարության երեկվա որոշմամբ, ֆինանսների նախարարին արտոնություն է տրվում անձամբ վերահսկել նախարարության ԾԻԳ-երի գնումների գործընթացը: Մեր հարցին, թե ֆինանսների նախարարի առթիվ կառավարության որոշումն ի՞նչ ազդեցություն կունենա գնումների գործընթացի վրա, «Թրանսփարենսի ինտերնեշնլ» հակակոռուպցիոն կազմակերպության տնօրեն Վարուժան Հոկտանյանը պատասխանեց. «Քանի որ որոշումը երեկ է ընդունվել, ես ծանոթ չեմ: Երևի իմաստն այն է, որ վերահսկելի լինի գնման գործընթացը: Հիմա դա ինչքանով է իրական վերահսկելիություն, մենք կարող ենք տարբեր ենթադրություններ անել: Դա կախված է, թե ինչպիսի մշակույթ կա տվյալ նախարարությունում: Եթե կոռուպցիոն ռիսկերը նվազեցնելու կամք կա, գուցե դա դրական արդյունք ունենա, եթե չկա՝ դա ընդամենը կոռուպցիոն ռիսկերի տեղափոխում է այլ մակարդակ»:
Վարուժան Հոկտանյանն ասաց, որ իրենք շարունակելու են ուսումնասիրությունը:
Դիտեք մեր հարցազրույցը «Թրանսփարենսի ինտերնեշնլ» հակակոռուպցիոն կազմակերպության տնօրեն Վարուժան Հոկտանյանի հետ:
