Հայաստանում ցուցմունք կորզելու բիրտ մեթոդներից անցում է կատարվում ստոր մեթոդներին: «Առաջին լրատվական»-ի հետ զրույցում «Քաղաքացիական հասարակության ինստիտուտ» ՀԿ նախագահ Արման Դանիելյանը նշեց, թե այս վիճակի հիմքերը դրվել են դեռ խորհրդային ժամանակներում: Նրա համոզմամբ՝ անհրաժեշտ են համապատասխան մասնագիտական գիտելիքներ, որ նրանք կարողանան առանց խոշտանգումների քրեական գործեր բացահայտել:
Անդրադառնալով գլխավոր դատախազ Գևորգ Կոստանյանի աշխատանքային ձեռքբերումներին՝ նա նշեց, թե գուցե ժամանակը քիչ է, որ դրական միտումներ լինեն, բայց ընդհանուր առմամբ դատախազության հետ կապված մի քանի խնդիր կա. նախ՝ քննության օրինականությունը վերահսկող դատախազը և դատարանում մեղադրանք պաշտպանողը նույն դատախազն է, այսինքն՝ քննության ընթացքում եղած խախտումները դատախազը փորձում է դատարանի դահլիճում արդեն կոծկել:
Դանիելյանը հիշեց Լևոն Գուլյանի գործը, ով մահացել էր Ոստիկանության գլխավոր շենքում, նաև հիշեցրեց դատախազության գործելաոճն այս գործի հետ կապված: «Գործը քննել էր սկզբում ոստիկանությունը, հետո ՀՔԾ-ն, եկել էին եզրակացության, որ Գուլյանը, լինելով վկա, փորձել է փախչել, թեև ըստ գործի նյութերի՝ կամավոր էր եկել, ապա ընկնելով երկրորդ հարկից՝ մահացել է: Այսպիսի անհեթեթ ձևակերպման չհավատաց նույնիսկ ՀՀ դատարանը: Երբ դատարանը գործը վերադարձրեց լրացուցիչ քննության, դատախազությունը բողոքարկեց այդ որոշումը և ասաց՝ գործը պիտի փակվի, այսինքն՝ դատախազությունն ակնհայտ ձևով ասում էր՝ մենք էս գործը չենք բացահայտելու և չբացահայտեցին, այսօր գործը Եվրոպական դատարանում է»,- ասաց նա:
Դանիելյանը նշեց, թե ուրախ կլինի, եթե գլխավոր դատախազը կարողանա բացառել կաշառքն ու անմեղ մարդկանց պատժվելը, ապա ցավով նշեց, որ այս համակարգում անձերը շատ բան են որոշում, մինչդեռ կայացած համակարգերում այդպես չի. անձը շատ բան չի կարողանում փչացնել համակարգի աշխատանքում, շտկելն էլ է դժվար, իհարկե, բայց փչացնել չի կարողանում: «Եթե կարողանա շտկել իրավիճակը, շատ ուրախ կլինեմ, բայց ճիշտն ասած՝ մտավախություն ունեմ, որ շատ դժվար է լինելու»,- ասաց նա:
Մանրամասները՝ տեսանյութում:
