ՌԴ նախագահ Պուտինի խորհրդական Սերգեյ Գլազևը «Վեստնիկ Կավկազա» պարբերականին տված հարցազրույցում հայտարարել է, որ Ռուսաստանն Ադրբեջանի հետ աշխատում է ամեն օր, և եթե ղարաբաղյան հակամարտությունը կարգավորվի, ապա Ադրբեջանը կմիանա եվրասիական ինտեգրացիոն գործընթացներին, ու իրենք գիտակցում են այդ հարցում ղարաբաղյան հակամարտության կարգավորման կարևորությունը: Գլազևը այդ մասին խոսել է՝ գնահատելով Լավրովի այցը Բաքու:
Գլազևը Պուտինի այն խորհրդականներից է, որոնց շուրթերով, այսպես ասած, բարբառում է ճշմարտությունը, այսինքն՝ հնչում են խոսքեր և գնահատականներ, որոնք պաշտոնապես Ռուսաստանը չի կարող հնչեցնել: Ասել է թե՝ ոչ պաշտոնապես Ռուսաստանի իշխանությունները Գլազևի միջոցով հնչեցնում են Ադրբեջանի համար, որ եթե վերջինս համաձայնվի Եվրասիական ինտեգրացիոն նախագծերի մաս դառնալ, ապա ղարաբաղյան հակամարտության կարգավորման գործընթացում կարող է ակնկալել համապատասխան դիվիդենտներ կարգավորման տեսքով: Այսինքն՝ Ռուսաստանն, ըստ էության, Գլազևի շուրթերով Ղարաբաղը դարձնում է Ադրբեջանին Եվրասիական միություն ներգրավելու խայծ:
Գլազևի արտահայտություններն, ըստ էության, բացում են ռուս-ադրբեջանական օրակարգը՝ ցույց տալով, թե ինչ գործարք են ռուսներն առաջարկում Բաքվին: Առայժմ ամենայն հավանականությամբ Բաքուն չի ընդունում ռուսական առաջարկները, քանի որ Լավրովի վերջին այցը վկայեց, որ խնդիրներ այնուամենայնիվ կան: Ալիև կրտսերը երևի թե ձգտում է հնարավորինս թանկ գին ուզել Եվրասիական ինտեգրացիոն նախագծերին մասնակցելու համար:
Սակայն այստեղ մի բանի հանդեպ պետք է ուշադիր լինել՝ եթե իր ռազմավարական դաշնակից համարվող Հայաստանին ռուսները բացահայտորեն շանտաժում էին Ղարաբաղում պատերազմով՝ Եվրաասոցացման համաձայնագիր ստորագրելու դեպքում, ապա ադրբեջանցիներին Մոսկվան պատերազմով կարծեք թե չի սպառնում: Ավելին՝ Ադրբեջանին շարունակում են զինել և երևի թե նաև զենքի արտոնյալ պայմաններ կառաջարկեն Եվրասիական ինտեգրացիոն ծրագրերի մեջ ներգրավվելու դիմաց:
Սա բացահայտ ցինիկ և արհամարհական վերաբերմունք է Հայաստանի հանդեպ, որ դրսևորում են ռուսները, և որի ֆոնին ադրբեջանցիները շարունակում են հայկական գյուղերի գնդակոծումը: Նրանք դա չեն դադարեցնում նույնիսկ ՀԱՊԿ-ի գլխավոր քարտուղար Նիկոլայ Բորդյուժայի հայաստանյան այցի ընթացքում: Այսինքն՝ ազերիները լավ գիտեն, որ նման դեպքերում ռուս պաշտոնյաները խուլ են և կույր, այսինքն՝ ոչինչ չեն տեսնում և ոչինչ չեն լսում, երբ խոսքը վերաբերում է Հայաստանի անվտանգությանը: Ռուսաստանը վերջին շրջանում զգայուն է դարձել միայն Ադրբեջանի հանդեպ: