Չնայած «Թրանսփարենսի ինտերնեշնլ» հակակոռուպցիոն կազմակերպության ուսումնասիրության արդյունքներով՝ պետական մարմինների կողմից կատարվող գնումների 67 տոկոսը կատարվում է մեկ անձից, և գնումների 15 տոկոսը կոռուպցիոն ռիսկեր են պարունակում, ֆինանսների նախարարության պետական գնումների աջակցման կենտրոնը որևէ գործով չի դրմել իրավապահներին: Այսօր «Թրանսփարենսի ինտերնեշնլ» հակակոռուպցիոն կազմակերպության ուսումնասիրության արդյունքների հրապարակման միջոցառման ժամանակ «Առաջին լրատվական»-ի հարցին, թե իրենք ի՞նչ են արել մինչ այժմ, որևէ գործընթաց բացահայտե՞լ են և իրավապահներին ինչ-որ բան ուղարկե՞լ են, կենտրոնի պետ Հարություն Թունյանն ասաց. «Իրավապահներին որևէ նյութ չի տրամադրվել՝ դրանց բացակայությամբ պայմանավորված»: Թունյանի խոսքերով՝ ահազանգերի հիման վրա վեց բողոք է ներկայացվել գնումների բողոքարկման խորհրդին:
Գնումների առթիվ Վերահսկիչ պալատի ուսումնասիրության հետ կապված՝ գնումների գործակալությունում որևէ գործընթաց չեն նախաձեռնել. Դեռ ուսումնասիրում են:
Քանի որ հակակոռուպցիոն կազմակերպության տվյալներով՝ պետգնումների 15 տոկոսը ռիսկային են, գնումների աջակցման կենտրոնի պետից հետաքրքրվեցինք, թե իրենք ի՞նչ են անում դրանք բացահայտելու ուղղությամբ: «Մենք վերլուծում ենք կատարվող գնումների ընթացակարգերը, կվերլուծենք նաև ներկայացված մոնիտորինգի արդյունքները: Դրանով պայմանավորված՝ կձեռնարկվեն համապատասխան ընթացակարգեր»,- ասաց Թունյանը:
Մեր հարցին, թե քանի որ պետական մարմինների կողմից կատարվող գնումների 67 տոկոսը կատարվում է մեկ անձից, նշանակո՞ւմ է գնումների աջակցման կենտրոնն այնքան էլ լավ չի աշխատում, Հարություն Թունյանն ասաց. «Մեկ անձով պայմանավորված գնումները կատարում են պատվիրատուները, և գնումների աջակցման կենտրոնը որևէ ուղղակի առնչություն չունի այդ գնումների հետ: Դրանք այլ գնման ընթացակարգեր են»: Նա նաև հայտարարեց, որ իրենց կենտրոնը վերահսկողություն չի իրականացնում:
Կառավարության երեկվա որոշմամբ, ֆինանսների նախարարին արտոնություն է տրվում անձամբ վերահսկել ԾԻԳ-երի գնումների գործընթացը: Մեր հարցին, թե դա ի՞նչ ազդեցություն կունենա գնումների գործընթացի վրա և արդյոք հակակշիռները չեն խախտվում, գնումների աջակցման կենտրոնի պետը նման պատասխան տվեց. «Ոչ, այդ փոփոխությունը վերաբերում է պատվիրատու ղեկավարին, որպես գնումների իրականացնող մարմնի, և դա լուծում է կառուցվածքային փոփոխությունների հետ կապված խնդիրները»:
Դիտեք մեր զրույցը պետական գնումների աջակցման կենտրոնի պետ Հարություն Թունյանի հետ: