Ադրբեջանական կողմը պատրաստ է Փարիզում բանակցություններ սկսել Ուորլիքի կետերի շուրջ: Այս մասին այսօր «Առաջին լրատվական»-ի հետ զրույցում ասաց Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն:
Նա տեղեկացրեց, որ Ադրբեջանի նախագահն ընդունել է Ֆրանսիայի նախագահ Ֆրանսուա Օլանդի հրավերը նախագահների մակարդակով հանդիպելու Փարիզում: Բայց, ամենայն հավանականությամբ, հանդիպմանը խանգարող հանգամանքներ կան, և նրա խոսքով՝ այդ հանգամանքները Հայաստանում են, քանի որ Ադրբեջանը պատրաստ է հանդիպել:
«Ադրբեջանն ընդունել է նորացված Մադրիդյան սկզբունքները 2010թ. , այն փաստաթուղթը, որը տարածվեց Սպիտակ տան մամլո ծառայության միջոցով: Ադրբեջանի պաշտոնական տեսակետն այն է, որ այդ սկզբունքների հիմքի վրա կարելի է սկսել ԼՂ հակամարտության կարգավորման բանակցությունները, իսկ Հայաստանն այդ փաստաթղթի առանձին ֆրագմենտների վերաբերյալ է դիտարկումներ անում ժամանակ առ ժամանակ»,- նշեց ադրբեջանցի փորձագետը՝ հավելելով, որ ցանկալի է հանդիպման կայացումը:
Սակայն, ըստ նրա, ինչպես և պնդել էր Ադրբեջանի ԱԳ նախարարը, անհրաժեշտ է հստակություն: Ահմեդօղլուի խոսքով՝ հստակություն ասելով ադրբեջանական կողմը նկատի ունի, թե ինչ կոնկրետ սկզբունքի շուրջ են սկսվելու բանակցությունները, այսինքն՝ որոշակիություն:
«Օրինակ՝ Հայաստանը պատրաստ է վերադարձնել ԼՂ-ի շուրջ մի քանի շրջանները, ումից է դա կախված: Ես կարծում եմ, որ Հայաստանը պետք է որոշում կայացնի հրաժարվել այդ շրջաններից և ոչ մի կերպ չի հանգում այդ որոշմանը: Սա նորացված Մադրիդյան սկզբունքների առաջին կետն է: Եթե մենք այս պահին այլ փաստաթուղթ չունենք, ապա Հայաստանը պետք է որոշում կայացնի»,- ասաց նա ՝շարունակելով, որ հստակություն ասելով նկատի ունի Ուորլիքի ներկայացրած կետերը, և այն, թե որ քայլն է լինելու առաջինը:
Անդրադառնալով հայ-ադրբեջանական սահմանի Նախիջևանի հատվածում կրակահերթերի ալիքի բռնկմանը՝ նա ասաց, որ հակամարտությունը լուծում է պահանջում: «Խաղաղ ճանապարհով բանակցությունները չեն հաջողվում, ԵԱՀԿ Մինսկի խմբի համանախագահները նույնիսկ իրենց ինքնավստահությունն են կորցրել: Դիվանագիտությունը, քաղաքականությունը, խաղաղ երկխոսությունը չեն ընթանում և արդյունք չեն տալիս, իսկ հակամարտությունը լուծում է պահանջում: Իսկ ի՞նչ ճանապարհով: Եթե չի աշխատում դիվանագիտությունը, պետք է աշխատի զենքը»,- նշեց ադրբեջանցի փորձագետը՝ շարունակելով, որ եթե խաղաղ բանակցություններն օգուտ չեն տալիս, ապա պետք է լինեն ռազմական գործողություններ:
