«Հայաստանի քաղաքական մշակույթը մնում է արատավոր և խիստ հատվածային: Ես չեմ ուզում կենտրոնանալ Րաֆֆի Հովհաննիսյանին չմոտենալու դեպքի վրա. այդ դեպքը ուղղակի այդ քայլերից մեկն էր, և նման բան մենք տեսնում ենք տարբեր իրավիճակներում: Այդ հատվածայնությունը սպանում է»,- անդրադառնալով մեծ քննարկում ստացած այն հանգամանքին, որ մարտի 17-ին Լևոն Տեր-Պետրոսյանը չմոտեցավ Ազատության հրապարակում հացադուլի նստած Րաֆֆի Հովհաննիսյանին` կարծիք հայտնեց «Ղարաբաղ» կոմիտեի անդամ Աշոտ Մանուչարյանը:
Մանուչարյանի խոսքերով, Րաֆֆի Հովհաննիսյանին չմոտենալը հենց այդ քաղաքական մշակույթի և այդ մշակույթի հատվածայնության արդյունք է. «Երբ որ քաղաքական ուժը խնդիրներին մոտենում է ոչ թե ամբողջական, այլ առանձին փոքրիկ շահերից ու նպատակադրումներից ելնելով, այդ ամենը հանգեցնում է նմանատիպ դրսևորումների»:
Մանուչարյանի գնահատմամբ, հայաստանյան քաղաքական ուժերը կարծում են, որ ընտրյալ կաստա են և իրենց համար օրենքներ գրված չեն, և իրենք են ստեղծում օրենքներն ու դրանցով առաջնորդվում. «Դա բացարձակապես այդպես չէ, նրանք ընդամենը գործիք են ժողովրդի և հասարակության ձեռքում, որպեսզի իրականացնեն ժողովրդի կամքը, ուրիշ կիրառում նրանք չունեն»: