«Հայաստանի անդամակցությունը ԵՏՄ-ին չի լինելու այդքան արագ, եթե նույնիսկ ի վերջո լինելու է ինչ-որ անդամակցության խնդիր: Նույնիսկ կարելի է շնորհակալություն հայտնել Ղազախստանի և Բելառուսի ղեկավարներին, որոնք ձգձգում են Հայաստանի անդամակցությունը, որովհետև չեմ հավատում, որ Հայաստանի շահերը եվրասիական ինտեգրման ուղու վրա են: Ինչքան դանդաղ գան, ինչքան երկար տևի գործընթացը, ինչքան չհաջողվի, այնքան ուրախ կլինեմ, քանի որ Հայաստանը կբռնի եվրոպական ինտեգրման ուղին»,- այսօր լրագրողների հետ զրույցում անդրադառնալով ԵՏՄ-ին Հայաստանի անդամակցման գործընթացին՝ նման կարծիք հայտնեց ԱԺ «Ժառանգություն» խմբակցության պատգամավոր Թևան Պողոսյանը:
«Առաջին լրատվական»-ի խնդրանքով անդրադառնալով Քոչարյանի վերջին հարցազրույցին և կարծիքներին, թե քառյակի միջոցով Քոչարյանը փորձ է անում վերադառնալ մեծ քաղաքականություն, Պողոսյանը նկատեց. «Ժառանգությունն ունի Հայաստանի զարգացման իր տեսլականը: Այն, որ տարբեր մարդիկ համակարծիք են և կարող են համամիտ լինել քառյակի առաջադրած հարցերին, չի նշանակում, որ նրանք միանգամից դառնում են քառյակի անդամ: Որքանով ես եմ մասնակցել քառյակի հանդիպումներին, տեսել եմ միայն այն մարդկանց, ովքեր մասնակցել են, իսկ Քոչարյանին երբեք այնտեղ չեմ տեսել»,- նկատեց Պողոսյանը:
Դիտարկմանը, թե Քոչարյանի՝ քառյակի որոշ կետերին համաձայնելը չէր կարող պատահական լինել, պատգամավորը պատասխանեց. «Ցանկացած քաղաքական գործիչ կարող է օգտագործել իրավիճակը իր համար: Մենք պետք է գիտակցենք, որ այդ հարցերն այսօր հուզում են բոլորին: Դրանք խնդիրներ են, որ ծագել են Հայաստանի առաջ, և ցանկացած քաղաքական ուժ փորձում է դրանց լուծում գտնել: Եվ եթե կհանդիպեն մի քանի քաղաքական ուժեր, որոնք կունենան նույն մոտեցումները, չի նշանակում, որ միանգամից համագործակցություն է լինելու նրանց միջև»:
Մանրամասները՝ տեսանյութում: