Վերջին շրջանում Ռոբերտ Քոչարյանը կրկին ակտիվացել է. հայտարարություններ է տարածում տարբեր թեմաների շուրջ՝ կարմիր գծերից մինչև քառյակի 12 պահանջներ ու «Որոտանի» խնդիր:
Զարմանալիորեն քառյակի և Ռոբերտ Քոչարյանի մոտեցումները համընկնում են, ինչը հանրության լայն շրջանակներին առիթ է տալիս մտածելու՝ քանի որ քառյակում ճնշող մեծամասնությունը ԲՀԿ-ն է, հենց այդ ուժն էլ փորձում է առաջ տանել Ռոբերտ Քոչարյանի շահերը, իհարկե՝ ուղղորդվելով հենց Ռոբերտ Քոչարյանի կողմից:
Այս թեմայի շուրջ «Առաջին լրատվական»-ի հարցախույզում մարդկանց մեծ մասը նկատեց, որ ԲՀԿ-ն շարժվում է ոչ թե առաջնորդվելով ժողովրդի շահերով, այլ իր և Ռ. Քոչարյանի, և, այսպես ասած, ընդդիմադիրի «խաղեր» է տալիս:
Ըստ քաղաքացիների՝ աթոռը գայթակղիչ է, ուստի ամեն քայլի դիմում են: Միայն թե հարցախույզի մասնակիցները չեն ցանկանում, որպեսզի Ռոբերտ Քոչարյանը վերադառնա իշխանության: Նրանց խոսքով՝ շուրջ 10 տարի ի՞նչ է արել, որ հիմա անի. «Գա՝ ի՞նչ անի, որ թալանի՞. ոչ մի լավ բան չեմ հիշում՝ բացի սպանությունից ու թալանից»:
Հարցախույզի որոշ մասնակիցներ հարցը լսելուց հետո անգամ բարկացան՝ նշելով. «Զզվում ենք դրանցից՝ սաղից»: