Ժողովրդական կուսակցության նախագահ Տիգրան Կարապետյանը այսօր մեզ հետ զրույցում բացասական վերաբերմունք արտահայտեց այն երևույթի հանդեպ, որ մարտի 17-ին, երբ Հայ ազգային կոնգրեսը մտավ Ազատության հրապարակ, որտեղ նստած էր Րաֆֆի Հովհաննիսյանը, ընդդիմադիր զանգվածի լիդերները չմոտեցան նրան։
«Ես դա համարում եմ նախանձություն, ու գուցե դա էր դրդապատճառը, որ նրանք մտան Ազատության հրապարակ` ցանկանալով ասել, որ ոչ թե Րաֆֆին է առաջինը ըմբոստացել, այլ իրենք։ Սա խանդի տեսարան է, սա սիրուն բան չի։ Երբ խոսում են ժողովրդավարության, մարդկային արժեքների մասին, դա էր մարդկային արժեքը, որը պետք է ցուցաբերեին։ Ես օրը երկու անգամ այցելում եմ Րաֆֆի Հովհաննիսյանին` մարդկային առումով, որպես հայ մարդու, որպես խիզախ քայլի դիմողի։ Այնպես որ, այստեղ շատ-շատ հարցեր կան»։
Մեր այն հարցին, թե հավանական է, որ Տիգրան Կարապետյանն ու Րաֆֆի Հովհաննիսյանը առաջիկայում իրենց ուժերը միավորեն` Տիգրան Կարապետյանը պատասխանեց. «Ինչու չէ։ Ես ասել եմ, որ ես վերապահումով եմ մոտենում միայն կոալիցիային այսօրվա և ՀՀՇ-ին։ Մնացած բոլոր ուժերի համար ես բաց եմ համագործակցության համար։ Սակայն արձագանքելով մեր հարցին` Տիգրան Կարապետյանը ավելացրեց, որ դեռևս միավորման քննարկումներ չեն եղել։