Մինչև հուլիսի սկիզբ չեն լուծվի Հայաստանի եվրասիական ինտեգրացիայի հարցում առկա խնդիրները: «Առաջին լրատվական»-ի հետ զրույցում այս մասին ասաց ռուսաստանցի առաջատար վերլուծաբան, «Ռուսաստանը գլոբալ քաղաքականությունում» ամսագրի գլխավոր խմբագիր Ֆյոդոր Լուկյանովը՝ անդրադառնալով Սոչիում Հայաստանի առջև Շուվալովի առաջ քաշած պայմաններին:
Նա նշեց, որ Մոսկվան պատրվակներ չի փնտրում խոչընդոտելու Հայաստանի եվրասիական ինտեգրացիայի գործընթացին: Նրա համոզմամբ՝ պատրվակներ ու չշտապելու ցանկություն ունեն Բելառուսն ու Ղազախստանը, քանի որ նրանք հետաքրքրված չեն Հայաստանի անդամակցությամբ, հատկապես աշխարհաքաղաքական իրողությունների ներկայիս պայմաններում:
«Այն, ինչ ասաց Շուվալովը, արտահայտում է որոշակի իրականություն, քանի որ այն պայմանները, որոնց համաձայն տարբեր երկրներ սկսում են անդամակցել ԱՀԿ-ին, տարբեր են, և Հայաստանը միացել է որոշակի պայմանների հիման վրա այն բանից առաջ, երբ սկսել է եվրասիական ինտեգրացիայի գործընթացը: Ուստի բնական է, որ թեև ԵՏՄ-ն համապատասխանում է ԱՀԿ նորմերին, բայց կոնկրետ պայմաններ կան, որոնք անհրաժեշտաբար պետք է կարգավորվեն: Եվ դա անելը բխում է Հայաստանի շահերից, քանի որ Հայաստանը միանալով եվրասիական պրոյեկտներին՝ չի դադարում լինել ԱՀԿ անդամ: Դա անհրաժեշտ է՝ ինքդ քեզ ինչ-ինչ դժգոհություններից երաշխավորելու համար, որոնք կարող են լինել ԱՀԿ-ի կողմից: Այդ բանակցություններն առաջին հերթին անհրաժեշտ են Հայաստանին, քանի որ Հայաստանը պետք է ներդաշնակեցնի իր անդամակցությունը տարբեր միություններին»,- ասաց Լուկյանովը:
Եզրափակելով՝ նա ասաց, որ մինչև հուլիսի սկիզբ Հայաստանի անդամակցության հարցում առկա խնդիրները չեն լուծվի:
Հիշեցնենք, որ օրերս Սոչիում կայացած Եվրասիական տնտեսական հանձնաժողովի խորհրդի նիստից հետո ՌԴ առաջին փոխվարչապետ Իգոր Շուվալովը խոսել է Մաքսային միությունում առկա խնդիրների ու ԵՏՄ-ին Հայաստանի անդամակցության խոչընդոտների մասին: Նա մասնավորապես ասել է՝ եթե Հայաստանը միանա եվրասիական պրոյեկտներին, ստորագրի համաձայնագիրը, և այն վավերացվի, ապա փոխհատուցումների վերաբերյալ Հայաստանը պետք է բանակցություններ սկսի Առևտրի համաշխարհային կազմակերպության հետ, որտեղ Հայաստանը պարտավորվել է կիրառել և կիրառում է ցածր մաքսատուրքեր, իսկ դրանք իրենց հերթին տարբերվելու են ՄՄ-ի շրջանակներում Հայաստանի պարտավորություններից: Սակայն սա հայաստանյան փորձագիտական հանրության և քաղաքական գործիչներից ոմանց շրջանում որակվում է որպես պատրվակ Ռուսաստանի կողմից՝ ձգձգելու Հայաստանի ինտեգրացիոն գործընթացը:
