Վերաքննիչ քրեական դատարանում ավարտվեց Միքայել Ա.-ի գործով բերված վերաքննիչ բողոքի քննությունը: Գործը քննվել է Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ:
Ըստ մեղադրանքի՝ 24-ամյա Միքայելը 2013 թվականի ապրիլի 1-ին, ժամը 17-ի սահմաններում «Օդնոկլասնիկի» սոցիալական կայքում իր ստեղծած, սեռական բնույթի արտահայտություններ պարունակող անհատական էջի միջոցով այցելել է 12-ամյա տղայի՝ Թ.-ի անհատական էջ:
Նա տղայի նկատմամբ կատարել է անառակաբարո գործողություններ՝ նրա հետ սեռական հարաբերությունների շուրջ նամակագրություն վարելով:
Բացի այդ, 2013 թվականի ապրիլի 3-ին, ժամը 22-ի սահմաններում Միքայելը նույն կերպ, նույն կայքի անհատական էջից այցելել է 9 տարեկան տղայի՝ Մ.-ի անհատական էջ, գնահատել է նրա լուսանկարը: Ապա առաջարկել է համացանցով ընկերանալ:
Իննամյա երեխան, իր էջ այցելած օգտատիրոջ էջում տեսնելով սեռական բնույթ կրող արտահայտություններ, անմիջապես համակարգչի մոտ է կանչել հորը:
Վերջինս որդու անունից շփվել է Միքայելի հետ, որպեսզի բացահայտի նրա ինքնությունը:
Միքայելը, համոզված լինելով, որ շփվում է իննամյա երեխայի հետ, հաղորդագրությունների միջոցով առաջարկել է դիտել մանկական պոռնոգրաֆիա պարունակող տեսահոլովակներ, հետո քննարկել իրենց միջև հնարավոր սեռական հարաբերություններն ու դրանց ձևերը:
Իննամյա տղայի նկատմամբ անառակաբարո գործողությունները ամբաստանյալի կամքից անկախ պատճառներով ավարտին չեն հասցվել, քանի որ երեխայի փոխարեն նամակագրությունը վարել է նրա հայրը:
Վերջինիս հետ շփման ընթացքում՝ 2013 թվականի ապրիլի 17-ին Միքայելն իր անհատական էջում տեղադրել ու «երեխային» ներկայացրել է համացանցից ներբեռնված, մանկական պոռնոգրաֆիա պարունակող տեսահոլովակ:
Բացի այդ, 2013 թվականի ապրիլի 8-ին, ժամը 13-ին Միքայելը նույն եղանակով, նույն կայքի իր անհատական էջից այցելել է 13-ամյա տղայի՝ Հ.-ի անհատական էջ: Երեխայի հետ սեռական կյանքին վերաբերող այլասերված հարաբերությունների շուրջ նամակագրություն վարելով՝ կատարել է անառակաբարո գործողություններ:
Բացի այդ, Միքայելը 2012 թվականի հոկտեմբերից պարբերաբար ներբեռնել և իր համակարգչի տվյալների պահպանման համակարգում պահել է մանկական պոռնկագրական բնույթի սիրողական տեսանյութեր, որոնք հայտնաբերվել և առգրավվել են 2013 թվականի ապրիլի 19-ին՝ նրա բնակարանում կատարված խուզարկությամբ:
Ընդհանուր իրավասության դատարանում Միքայելն իրեն մեղավոր է ճանաչել մասնակիորեն:
Հայտնել Է, թե «Սկայպով» շփվել է Ուկրաինայի մի քաղաքացու հետ, նա իրեն «link» է ուղարկել, որը պահպանվել է «spam»-ում և հետագայում բեռնվել է համակարգչի մեջ: Դա վերաբերում է իր համակարգչում հայտնաբերված բոլոր պոռնկագրական բնույթի նյութերին, որոնց քանակն ինքը չի հիշում:
«Օդնոկլասնիկի» կայքում շփվել է Թ.-ի ու Հ.-ի հետ, բայց հենց հասկացել է, որ նրանք անչափահաս են, նրանց ընդգրկել է «սև ցուցակում» ու այլևս չի շփվել:
Ինչ վերաբերում է Մ.-ին, ապա նա է իրեն անընդհատ սեռական հարցեր տվել, ինքն էլ ստիպված պատասխանել է: Չի հիշում՝ նրան «Սկայպով» տեսահաղորդագրություն ուղարկե՞լ է, որտեղ ինքը զբաղվել է ձեռնաշարժությամբ:
Ամբաստանյալն իրեն մեղավոր է ճանաչել միայն Մ.-ի հետ սեռական բնույթի նամակագրություն վարելու փորձի համար:
Նախաքննության ժամանակ քննիչի հարցին պաշտպանի ներկայությամբ պատասխանելով՝ Միքայելն ասել է, թե իր համար հետաքրքիր էր վերոհիշյալ տարիքի երեխաների ռեակցիան սեռական թեմաների շուրջ զրուցելիս:
Դատարանում իր նախաքննական խոստովանական ցուցմունքների հրապարակումից հետո ամբաստանյալը հայտարարել է, թե նման բովանդակությամբ ցուցմունքներ չի տվել, նախաքննության ընթացքում իր նկատմամբ բռնություն է գործադրվել, ինքը դրա մասին հայտնել է իր պաշտպանին:
Միքայելն իրեն մեղավոր է ճանաչել մանկական պոռնկագրական բնույթի տեսաֆիլմեր պահելու համար:
Մշակութաբանական փորձաքննության եզրակացությամբ՝ փորձաքննության ներկայացված 308 ֆայլերից մանկական պոռնկագրական բնույթի են 240 ֆայլը, 16-ը՝ մանկական էրոտիկ բնույթի են, իսկ 12-ը՝ պոռնկագրական բնույթի:
Ամբուլատոր դատահոգեբուժական և սեքսոլոգիական փորձաքննության եզրակացությամբ՝ Միքայել Ա.-ն տառապում է հոգեկան որոշակի հիվանդությամբ:
Ըստ եզրակացության՝ քանի որ փորձաքննվողի մոտ խախտված են եղել կոմունիկացիոն ունակությունները, դրանք կոմպենսացվել են համակարգչային գիտության մեջ խորանալով: Դրա շնորհիվ բարձրագույն կրթությամբ երիտասարդը իր համար ստեղծել է վիրտուալ աշխարհ, սոցիալական ցանցում շփումները գերադասել է իրական մարդկային շփումներից:
Փորձաքննվողի անձնային ոչ լիարժեք ձևավորմանը նպաստել է նաև ընտանեկան թերի դաստիարակությունը:
Միքայել Ա.-ն մեղսագրվող արարքի նկատմամբ ճանաչվել է սահմանափակ մեղսունակ: Դատապարտվելու դեպքում նա կարիք ունի նյարդահոգեբույժի ամբուլատոր հսկողության և բուժման՝ կալանավայրի պայմաններում:
Ընդհանուր իրավասության դատարանը Միքայելին մեղավոր է ճանաչել և վերջին հաշվով դատապարտել 4 տարի ազատազրկման:
Պատժի սկիզբը՝ 2013 թվականի ապրիլի 19-ից:
Որպես դատական ծախսեր՝ Միքայել Ա.-ից կբռնագանձվի 219 հազար 900 դրամ՝ կատարված փորձաքննությունների արժեքը:
Դատավճռի դեմ վերաքննիչ բողոք է բերել ամբաստանյալի շահերի պաշտպանը՝ միջնորդելով այն դրվագներով, որոնցով Միքայելն իրեն մեղավոր չի ճանաչել, արդարացնել նրան, մնացած մասով սահմանել օրենքով նախատեսված նվազագույն պատիժ: Դատական ծախսերն էլ բռնագանձել պետական բյուջեից:
Սակայն վերաքննիչ քրեական դատարանը դռնփակ ընթացակարգով քննելով պաշտպանի վերաքննիչ բողոքը՝ մերժեց այն՝ օրինական ուժի մեջ ու անփոփոխ թողնելով ընդհանուր իրավասության դատարանի դատավճիռը:
