Գործարար, օֆշորային սկանդալի պատճառով սնանկացման եզրին հայտնված Փայլակ Հայրապետյանն այսօր անակնկալի է եկել, երբ մամուլում կարդացել է նախկին վարչապետ Տիգրան Սարգսյանի՝ ԱՄՆ-ում ՀՀ դեսպան նշանակվելու մասին լուրը: Նրա խոսքերով՝ Տիգրան Սարգսյանի նշանակումն այս օրերին միտումնավոր է արված, որպեսզի նրան հնարավորինս հեռացնեն գործի քննության հիմնական փուլից:
«Թող մի հարցաքննվեր, տեսնեինք՝ ամեն ինչով մաքուր է, դրանից հետո թող գնար ոչ թե դեսպան, այլ թեկուզ Ամերիկայի պրեզիդենտ դառնար: Մենք նրան չէինք խանգարի: Իսկ երբ ամբողջ աշխարհը գոռում է, որ ինքը հանցագործություններ է արել,և դրանից հետո նրան նշանակում են դեսպան՝ դա աբսուրդ է»,-«Առաջին լրատվական»-ի հետ զրույցում ասաց Փայլակ Հայրապետյանը:
«Ես պետական ռեգիստրի օրինական դոկումենտների մասին եմ խոսում: Թող մնար, գնար մասնակցեր քննությանը, առերեսվեր համապատասխան մարդկանց հետո, ապացուցեր, որ ինքը ճիշտ է և նոր գնար Ամերիկա:Բայց ինքը գրել է, որ ինքը տեղյակ չէ այդ ամենից՝ դրանով «կռիշ» կանգնելով հանցագործին, ինչն ավելի ծանր հոդված է: Իսկ դեսպան նշանակելով՝ փորձ է արվում նրան հեռացնել նախաքննությունից, փորձ է արվում ջլատել նախաքննությունը: Բնավ պարտադիր չէր, որ այսօր գնար դեսպան: Հենց այս փուլում չէր կարելի նրան դեսպան նշանակել: Այստեղ հաստատապես միտում կա»,-հավելեց Հայրապետյանը:
Նշենք, որ ընդամենը մի քանի օր առաջ օֆշորային սկանդալի հիմնական դերակատար Աշոտ Սուքիասյանը արտահանձնվեց Հայաստանի իրավապահներին,և հույս կա, որ առաջիկայում կսկսվի գործով իրական քննություն,և կբացահայտվի եղելությունը, այդ թվում՝ նախկին վարչապես Տիգրան Սարգսյանի և Նավասարդ Կճոյանի մասնակցությունը այդ սկանդալին:
«Բայց այսքանից հետո ոչ մի հույս էլ չկա, որ էդ գործը կբացահայտվի: Եթե արդեն հերթով հիմնական մեղավորներին հեռացնում են գործից՝ դա նշանակումէ, որ փորձ է արվում գործը կոծկել»,-նկատեց գործարարը:
Լուսանկարը՝ News.am-ի
