Վերաքննիչ դատարանն այսօր բավարարել է Մարզահամերգային համալիրի հայցը, որով պետք է կասեցվի ԴԱՀԿ-ի հայտարարած աճուրդի որոշումը։ «Մենք դատարան ենք դիմել՝ Մարզահամերգային համալիրի գրավի իրավունքը դադարեցնելու և գույքն արգելանքից հանելու պահաջով։ ԴԱՀԿ մասին օրենքի 37 հոդվածի 5 կետի համաձայն՝ ԴԱՀԿ-ն պետք է կասեցներ աճուրդը, քանի որ գործը քննվում է դատարանում, սակայն չէր կասեցրել, և աճուրդի որոշումն անօրինական է»,- «Առաջին լրատվականի» հետ զրույցում ասաց Մարզահամերգային համալիրի իրավաբան Արմինե Հակոբյանը: Դատարանի այս որոշմամբ՝ մինչ վերոնշյալ հայցով դատական վճիռը համալիրի աճուրդը կկասեցվի:
Համալիրը կրկին աճուրդի կհանվի, թե ոչ՝ պարզ կլինի համալիրի գրավի իրավունքը դադարեցնելու և գույքն արգելանքից հանելու պահաջով Մարզահամերգային համալիրի հայցի առթիվ դատական վճռից հետո:
Այս պահին Մարզահամերգային համալիրի էլեկտրոնային աճուրդը ԴԱՀԿ կայքում դեռ դադարեցված չէ: Նշենք, որ այն այժմ աճուրդի է հանվել 15.6 մլրդ դրամով:
ՀՀ արդարադատության նախարարության դատական ակտերի հարկադիր կատարման ծառայությունը նախնական աճուրդի էր հանել Մարզահամերգային համալիրը 19 մլրդ 35 մլն դրամով (մոտ 48 մլն դոլար):
Հիշեցնեք. Ռուսաստանի Դաշնության կողմից ՀՀ-ին տրամադրված 500 մլն ԱՄՆ դոլար վարկից 2009 թ. կառավարությունը 20 մլն ԱՄՆ դոլար է տրամադրում Մարզահամերգային համալիրի հետ իրավական կապ չունեցող մի կազմակերպության, որի դիմաց գրավադրվում են համալիրի շենք-շինությունները: Ընկերությունը չի կարողանում ժամանակին մարել վարկը, և ստեղծված իրավիճակի պատճառով բավական երկար ժամանակ դատական գործընթացներ են լինում: Փաստաթղթերով, սակայն, Մարզահամերգային համալիրը վարկի հետ կապված որևէ պատասխանատվություն չէր կրում:
20 մլն դոլար պետական վարկի խնդիրը լուծելու համար որոշվում է համալիրի սեփականատեր ընկերությանը բյուջետային վարկ տրամադրելով մարել նախկին բանկային պարտավորությունները` այն պայմանով, որ համալիրի ի պահ հանձնված 75% բաժնետոմսերը վերադարձվեն Մարզահամերգային համալիրին: Այս վարկի մարումը ևս ձգձգվում է:
Մարզահամերգային համալիրի տնօրինությունն այսօր ակնկալում է, որ իրենց ժամանակ տրվի պարտքը մարելու համար: «Քանի որ պարտքի ժամկետը վերջանում էր, մենք անցյալ տարվա վերջին դիմեցինք, և խնդրեցինք, որ կառավարությունը մեզ պարտքի մարման ժամանակացույց տա, և հստակեցվի պարտքը, սակայն իրենք դիմեցին դատարան»,- «Առաջին լրատվականի» հետ զրույցում ասաց համալիրի ներկայացուցիչ Կորյուն Գրիգորյանը: Մեր հարցին՝ այժմ պարտքի մարման նոր ժամանակացո՞ւյց են ակնկալում, Կորյուն Գրիգորյանը պատասխանեց. «Մենք դրա համար էինք դիմել, որ խնդրում ենք երկու տարի ժամկետ՝ պարտքը մարելու համար»:
Երբ համալիրի տնօրինությունը վարկը երկարաձգելու համար դիմել է ՀՀ ֆինանսների նախարարությանը, մերժում է ստացել հետևյալ պատճառաբանությամբ` գրավառու-վարկատուի իրավունքը ՀՀ անունից վերապահվել է ՀՀ ՊՆ-ին: Թե որ օրենքով է ֆինանսների նախարարությունը բյուջեի պարտքը զիջել մեկ այլ կազմակերպության՝ հայտնի չէ:
Ի դեպ, Սերժ Սարգսյանն այսօր որոշում է կայացրել Մարզահամերգային համալիրի սեփականատիրոջ եղբորը՝ Մուրադ Մուրադյանին, Իրաքի դեսպանի պաշտոնից ազատելու մասին:
