Քիչ առաջ ավարտվեց իշխող Հանրապետական կուսակցության գործադիր մարմնի նիստը։ Նիստից հետո ՀՀԿ խոսնակ Էդուարդ Շարմազանովն ասաց, որ քննարկվել են ներկուսակցական, ներաքաղաքական, ինչպես նաև արտաքին քաղաքական հարցեր:
«Նախագահը ներկայացրեց տեղեկատվություն Վրաստան կատարած այցի մասին, ինչպես նաև ՌԴ արտգոծնախարար Սերգեյ Լավրովի այցի մասին»:
Հարցին՝ համարժե՞ք էր այսօր ԵԽԽՎ հայաստանյան պատվիրակության արձագանքը Ալիևի հայտարարություններին, Շարմազանովը պատասխանեց. «Միշտ էլ տեսականորեն կարելի է տարբեր սցենարներ քննարկել: Այստեղից Ստասբուրգ շատ հեշտ է դատողություններ անել, բայց որևէ մեկի հայրենասիրությանը չեմ կասկածում, նրանք պրոֆեսիոնալ են, և եթե այնտեղ նման որոշում են կայացրել, ուրեմն դա ճիշտ էր: Մենք Երևանում նստած՝ չենք կարող ասել՝ ինչն է ճիշտ, ինչը սխալ. եթե նման միասնական որոշում է կայացվել, ուրեմն տվյալ դեպքում դա է ճիշտ»:
Ինչ վերաբերում է Հայաստանի ԵՏՄ-ին անդամակցությանը և դրա ճանապարհին առաջ եկած խոչընդոտներին, Շարմազանովն ասաց. «Քաղաքական որոշում է կայացվել, Մաքսային միության և ԵՏՄ որևէ երկիր վերապահումով չի խոսել Հայաստանի անդամակցության մասին… Մնացել է երկու-երեք հարց, դրանք տեխնիկական բնույթի են։
ՀՀԿ խոսնակն անդրադարձավ նաև երկրորդ նախագահ Ռոբերտ Քոչարյանի հարցազրույցին և այն տեսակետներին, թե քառյակը համագործակցում է Քոչարյանի հետ ու ասաց. «Տարբեր գարսենյակներից մեկնաբանություններ հնչում են այդ մասին, բայց դա երկրորդ նախագահի և քառյակի որոշելու հարցն է: Մենք մեր քաղաքական առաջնորդն ունենք ու մեր պլատֆորմը, մենք մեր ծրագրով առաջ ենք շարժվելու, յուրաքանչյուր ներկա կամ նախկին պաշտոնյա ունի այս կամ այն հարցի իր լուծման տարբերակը: Մեր խնդիրը ոչ թե գեղեցիկ ու պուպուշ խոսելն է, այլ խնդիրներ լուծելը»: