«Մենք հանդիպել ենք խոշոր գործարարների և բանկերի ղեկավարների հետ, քննարկել համագործակցության բազմաթիվ հարցեր, սահմանել խաղի կանոններ: Մենք պայմանավորվել ենք, որ բոլորը պետք է աշխատեն հավասար դաշտում, և բոլորն ամեն ինչ պետք է անեն, որպեսզի դուրս գան ստվերից: Դա եղել է մեր պայմանը: Մինչև հուլիսի 1-ը մենք տալու ենք հնարավորություն, որպեսզի իրենք ինքնուրույն՝ իրենց ցանկությամբ փորձեն աշխատել հավասար դաշտում»,- մայիսի 14-ին գործարարների հետ հանդիպումից հետո ասել էր վարչապետ Հովիկ Աբրահամյանը:
Հուլիսի 1-ին հաշված օրեր են մնացել, և բոլորին շատ հետաքրքիր է, թե Հովիկ Աբրահամյանի՝ գործարարներին ստվերից դուրս բերելու օպերացիան ինչ արդյունքներ կգրանցի: Թեև նա օրերս հայտարարեց, որ արդյունքը հուլիսի 1-ից հետո է երևալու, երբ ՊԵԿ-ը տասնօրյակը մեկ ստուգումներ իրականացնի և հաշվետվություն ներկայացնի, թե որ գործարարի մոտ հարկային ինչ փոփոխություններ են նկատվել, սակայն որոշ գործարարների մոտ այս ընթացքում արդեն 2-3 ստուգում եղել է:
Այն, որ գործարարների մոտ արդեն իսկ ստուգումներ են իրականացվել, փաստում են հենց իրենք, բայց շտապում են հավելել, որ այդ ստուգումների արդյունքում ոչինչ չի հայտնաբերվել, և Հովիկ Աբրահամյանի հայտարարությունից առաջ էլ իրենք աշխատում էին ստվերից դուրս՝ օրինական հարկային դաշտում:
«Ինձ պատկանող հիմնարկում միշտ էլ իմ աշխատանքը թափանցիկ է եղել: Միշտ էլ հարկերը վճարվել են: Էնպես որ՝ առանձին փոփոխություններ իմ հիմնարկը չի զգացել»,- «Առաջին լրատվական»-ի հետ զրույցում ասաց ԱԺ ՀՀԿ-ական պատգամավոր Մանվել Բադեյանը, ով ևս մայիսին մասնակցում էր գործարարների հավաքին:
«Մարդիկ կան, որ շրջանցում էին օրենքը, այ, իրենց համար փոփոխություններ եղել են, իսկ ինձ պատկանող հիմնարկում հարկերի շրջանցում չի եղել: Ով ազնիվ ա աշխատել, կշարունակի աշխատել, ով որ փորձել ա զարտուղի ճանապարհներով հարկերը թաքցնել՝ դրանց վրա մեծ տարբերություն կա»,-հավելեց Բադեյանը: Նշենք, որ նրան են պատկանում «Եվրոստան Ույուտ» և «Լույս Կոմ» ՍՊԸ-ները:
Նրա խոսքով՝ բոլորին հարկային դաշտ բերելու, հավասար մրցակցային պայմաններում աշխատելու վարչապետի ծրագիրը կիրագործվի: «Դա հնարավոր ա և անխուսափելի: Հուլիսի 1-ից ֆինանսների նախարարությունը իր զեկույցը կպատրաստի, և բոլորս կիմանանք՝ ինչն ինչոց է»:
Ստուգումներ են եղել նաև «Մաքս գրուպ»-ի սեփականատեր Խաչիկ Մանուկյանին պատկանող ընկերությունում: Հարկային պարտավորությունների, հարկերից խուսափելու հետ կապված որևէ խնդիր չի հայտնաբերվել: Երկու անգամ կատարված ստուգումների արդյունքում ընդամենը, իր խոսքով, տեխնիկական, թղթաբանական, մանր բաներ են հայտնաբերվել:
«Հարկերից խուսափելու որևէ խախտում չի գրանցվել: Ես հարկային դաշտում աշխատելու հետ կապված խնդիր չունեի: Իմ մասով ոչ մի փոփոխություն չի լինելու հուլիսի 1-ից հետո, քանի որ ես աշխատում եմ հենց վարչապետի հայտարարած դաշտի մեջ»,- ասաց Մանուկյանը:
Նրա խոսքով՝ խոստացված օրվանից հետո չենք ունենա այն, ինչ ցանկանում է վարչապետը, այսինքն՝ որ բոլորն աշխատեն հավասար մրցակցային դաշտում, ստվերից դուրս, բայց այդ օրվանից կսկսվի ավելի հետաքրքիր գործընթաց, և կունենանք բավական հետաքրքիր պատկեր:
«Ով որ ասում է, որ ստվեր կա, ուրեմն ինքը հաստատ գիտի՝ որտեղ է ստվերը, և ըտեղից էլ պետք ա սկսի երևի»,- եզրափակեց գործարարը:
