Թուրքական Hürriyet թերթի սյունակագիր, հայտնի վերլուծաբան Մեհմեթ Ալի Բիրանդն իր հոդվածում անդրադարձել է Էրդողանի մոսկովյան այցին.
«Ներկայումս շատ կարևոր է, թե Էրդողանն ինչպես է իրեն պահել միջերկրածովյան Մերսին նահանգի Աքքույու վայրում Ռուսաստանի կողմից թուրքական առաջին ատոմակայանի նախագծի իրականացման հարցում:
Բնականաբար, ես չգիտեմ, թե Էրդողանն ու Մեդվեդևն ինչ են խոսել, սակայն իմ դատողությունները հենված են մամլո ասուլիսի ժամանակ նրանց պահելաձևի վրա:
Պետք է նկատել, որ Թուրքիան անհավանական քայլ է կատարել` Ռուսաստանին ընդառաջ գնալով, ինչին վստահաբար չէր գնա աշխարհի և ոչ մի երկիր: Դա առավել ակնառու է դառնում Ճապոնիայում տեղի ունեցած միջուկային աղետի ֆոնին: Արդյո՞ք Ռուսաստանը գիտակցում է այդ ամենը:
Ընդհանուր առմամբ, աշխարհը չեռնոբիլյան անցյալ ունեցող Ռուսաստանին խորապես չի վստահում թե՛ տեխնոլոգիաների, թե՛ անվտանգության միջոցների, թե՛ կադրերի պատրաստման հարցում: Եվ չնայած դրան` Էրդողանը հայտարարեց, որ, անկախ ամեն ինչից, նա վստահում է Ռուսաստանին` թուրքական առաջին ատոմակայանի կառուցման նախագծի իրագործման հարցում: Դա վստահության շատ մեծ քվե է ռուսական միջուկային ոլորտին:
Ինչ-որ տեղ կարող է զարմանալի թվալ այն, որ Անկարան չափազանց բարեկամական մոտեցում է ցուցաբերում Մոսկվայի հանդեպ, քանի որ այսօր աշխարհը թերահավատորեն է նայում տվյալ ոլորտում այնպիսի բարի համբավ ունեցող երկրներին, ինչպիսին, ասենք, Ճապոնիան է:
Միևնույն ժամանակ, Էրդողանը կարող էր օգտվել ճապոնական աղետից և Ռուսաստանին հայտարարեր, որ, կապված վերջին իրադարձությունների հետ, իրենք վճռել են վերանայել այդ նախագիծը: Սակայն նա վարվեց հակառակ կերպ:
Այժմ մենք համակ ուշադրությամբ պետք է հետևենք Ռուսաստանի պատասխան քայլերին: Ինձ հետաքրքրում է` արդյո՞ք Ռուսաստանը համարժեք կերպ կփոխհատուցի Թուրքիային: Արդյո՞ք Ռուսաստանը կփոխի գազի գների շուրջ իր անզիջում դիրքորոշումը և որոշակի զիջումների կգնա Թուրքիային: Արդյո՞ք նա կվերանայի կիպրական հարցում իր որդեգրած դիրքորոշումը:
Տրամաբանությունը հուշում է, որ հենց այդպես էլ պետք է լինի. ես քեզ, դու ինձ»:
Հիշեցնենք, որ Աքքույուի ատոմակայանի կառուցման տենդերը հայտարարվել է 2008 թվականի մարտի վերջին: Համապատասխան հայտեր էին ներկայացրել 13 ընկերություններ, որոնցից Թուրքիայի ատոմային էներգիայի գործակալությունը 2009 թվականի մայիսին ընտրեց «Ռոսատոմի» դուստր ընկերություն հանդիսացող «Ատոմստռոյէքսպորտ» ընկերությանը: Վերջինս պետք է 4 էներգաբլոկ և 4800 մեգավատտ հզորությամբ ատոմակայան կառուցի Աքքույուում: Նախագիծը գնահատվում է 20 միլիարդ դոլար: