Վարչապետ Հովիկ Աբրահամյանը խոստացել է կարճ ժամանակում մրցակցային հավասար դաշտ ապահովել բոլոր գործարարների համար: Տնտեսական մրցակցության պաշտպանության պետական հանձնաժողովի պայքարի արդյունքում, սակայն մոնոպոլիաները Հայաստանում չեն փոխվում, փոքր ու միջին բիզնեսի ներկայացուցիչները շարունակում են դժգոհել խոշորների հետ անհավասար պայմաններից: Այս հարցերի շուրջ «Առաջին լրատվական»-ը զրուցեց ՏՄՊՊՀ նախագահ Արտակ Շաբոյանի հետ:
– Պարոն Շաբոյան, փաստորեն Հայաստանում մենաշնորհները չեն փոխվում, բայց Ձեզ այդ ընթացքում հաջողվում է մրցակցային դաշտ ապահովել, ինչպես Դուք եք ասում, դա ինչպե՞ս կբացատրեք:
– Ես չգիտեմ՝ տնտեսվարողների սեփականատերերը ովքեր են, ովքեր չեն, ինչպիսի հասարակական, քաղաքական կարգավիճակ ունեն, դա, բնականաբար, մեզ չի հետաքրքրում: Մենք գործ ունենք ընկերությունների հետ: Այնպիսի թյուր տպավորություն կա, որ խոշոր լինելը, խոշորացումը, գերիշխող դիրք զբաղեցնելը դա մրցակցության խախտում է հանդիսանում: Իհարկե, ոչ: Ամբողջ աշխարհում ընդունված է, որ խոշոր լինելը, գերիշխող դիրք զբաղեցնելը` դա խախտում չէ, դա բացարձակ խնդիր չի: Խնդիրը նրանց կողմից թույլ տված չարաշահումներն են: Իհարկե, մենք բազմաթիվ չարաշահումներ բացահայտել ենք այս տարիների ընթացքում: Եվ որևէ մեկը չի կարող ասել, որ որևէ չարաշահման փաստի առթիվ դիմել է մեր հանձնաժողովին, այդ խնդիրը գտնվել է հանձնաժողովի իրավասության շրջանակներում, և մեր բոլոր որոշումները հրապարակային են, մեր ինտերնետային կայքում է տեղադրված:
– Պարոն Շաբոյան, փոքր ու միջին բիզնեսի ներկայացուցիչները բազմիցս բողոքում են խոշորների հետ անհավասար մրցակցային պայմաններից: Դուք խոշորների խախտումների դեմ իրականում չե՞ք կարողանում պայքարել, միայն ժամանակ առ ժամանակ նրանց տուգանում եք որոշակի չափով, և դա է լինում Ձեր պայքարի ձևը: Դրանից որևէ էական բան չի փոխվում:
– Իսկ ի՞նչ գիտեք, չի փոխվում: Իհարկե, շատ բան փոխվում է: Ընդամենը մի օրինակ եմ բերում,- այդպիսի օրինակները բազմաթիվ են,- պետգնումների ոլորտում մենք ուսումնասիրություններ իրականացրեցինք, սոցիալական հաստատությունները ուսումնասիրեցինք, մանկապարտեզների գործունեությունը, բուժհաստատությունների գործունեությունը, և պարզվեց, որ համատարած երևույթ է այն, որ պետական հիմնարկները պետգնումներով չեն աշխատում, այսինքն՝ ուղղակի պայմանագիր են կնքում իրենց ուզած տնտեսվարողի հետ: Այսինքն՝ շրջանցում են պետգնումների օրենսդրությունը: Մենք հարյուրավոր դեպքեր բացահայտեցինք տարբեր ոլորտներում, մեղավորներին պատասխանատվության ենթարկեցինք: Այն պետական մարմինները, որոնց պատասխանատվության չկարողացանք ենթարկել, ուղարկեցինք իրավապահներին:
– Իսկ քանի՞ հոգի դրա համար պատասխան տվեց, քանի՞ պետական մարմին դրա համար պատասխան տվեց: Կարո՞ղ եք անուններ նշել:
– Ընկերությունների անունները այս պահին ես չեմ կարող նշել, կարող եք հարցում ուղարկել, տանք այդ ընկերությունների անունները: Ինչի չեմ ուզում անուններ նշել, որովհետև հիմա այս պահին կարող է մեկի անունը տամ, մյուսի անունը չտամ, ես չեմ ուզում, որ ինչ-որ մի տնտեսվարող թիրախավորվի: Անուններ տալու դեպքում պետք է բոլորի անունները տալ: Իհարկե, տրվել են մամուլով մշտապես բոլորի անունները տրվել են: Անունները շատ են, հարյուրավոր անունների մասին է խոսքը և ուրախալին այն է, որ հանդիպումների ժամանակ շատ տնտեսվարողներ մեզ շնորհակալություն են հայտնել, գոհունակությամբ նշել են, որ պետգնումների ոլորտում իրավիճակ է փոխվել: Արդեն պետական մարմինները մրցույթներ են իրականացնում պատշաճ կարգով, և տնտեսվարողները բոլորը հնարավորություն ունեն մասնակցել այդ մրցույթներին:
– Նաև բավական դժգոհություն կա Ձեր հանձնաժողովից և բավական դատական հայցեր կան հանձնաժողովի հարուցած վարույթների հետ կապված:
– Եթե դիմել են դատարան, դա նշանակում է՝ դժգո՞հ են մեզանից: Դուք կարո՞ղ եք ինչ-որ տնտեսվարողի ասել, որը տուգանվել է, և որը գոհունակությամբ նշում է, որ այո, ինքը մեղավոր է և ինքը սխալ է թույլ տալիս:
– Կան նաև դատական դեպքեր, երբ տուգանքները վերականգնվում են, այսինքն՝ դուք եք սխալ լինում:
– Չկան, եթե գիտեք, ասեք: Ընդամենը մի դեպք է եղել այս մի քանի տարիների ընթացքում:
– Ասել է թե՝ Ձեր կարծիքով, այս ընթացքում ընդամենը մե՞կ իրական բողոք է եղել ձեր դեմ:
– Ոչ թե իրական բողոք է եղել, պարզապես այդ խնդրի հետ կապված բավական շատ ապացուցման կարիք կար: Մենք գտնում էինք, որ խնդիրը կար, բայց մեր ապացուցողական բազան մի քիչ թույլ էր, և մենք չկարողացանք լիարժեք ապացուցել, բայց մենք գտնում ենք՝ խնդիր կա: Միանշանակ չէր, որ մենք սխալ էինք տուգանել, իհարկե դա այդպես չէր: Ավելի շատ մեր իրավասությունները սահմանափակ էին, և մենք շատ ապացույցներ չունեինք: Իսկ մնացած բոլոր դեպքերով մենք միշտ էլ հաղթել ենք դատարաններում:
– Հավասար մրցակցային դաշտ ապահովելու մասին վարչապետի հայտարարությունից հետո դուք Ձեր գործունեության մեջ ի՞նչ եք փոխել, որ առավել հավասար մրցակցություն ապահովվի:
– Մենք մեր բոլոր ջանքերը ներդնելու ենք կառավարության ծրագրով ամրագրված խնդիրներն իրագործելու համար:
