Մոսկվայի խնդիրը մեկն է՝ Հայաստանի միացումը եվրասիական պրոյեկտներին չպետք է փչացնի ռուս-ադրբեջանական հարաբերությունները: «Առաջին լրատվական»-ի հետ զրույցում նման կարծիք հայտնեց «Էքսպերտ» ամսագրի արտաքին քաղաքական հարցերով հատուկ թղթակից, վերլուծաբան Գևորգ Միրզայանը՝ անդրադառնալով օրերս Սոչիում կայացած ԵՏ հանձնաժողովի նիստի արդյունքներին և տեսակետներին, թե Ռուսաստանը միտումնավոր է ձգձգում եվրասիական ինտեգրացիոն պրոյեկտներին Հայաստանի միացման գործընթացը:
Նա նշեց, որ Ռուսաստանը շահագրգռված չէ եվրասիական ինտեգրացիոն պրոյեկտներին Հայաստանի անդամակցության ձգձգմամբ: Ըստ նրա՝ դա փաստ է, քանի որ ՄՄ-ն և ընդհանրապես ողջ եվրասիական ինտեգրացիայի թեման Վլադիմիր Պուտինի արտաքին քաղաքական առանցքային նպատակներից ու խնդիրներից է, ուստի նա չի փորձի տապալել սեփական պրոյեկտները: Սակայն, ըստ Միրզայանի, այլ հարց է, որ Ռուսաստանը չի ցանկանում, որպեսզի Հայաստանի անդամակցության գործընթացը փչացնի ռուս-ադրբեջանական հարաբերությունները:
«Ուստի եվրասիական պրոյեկտներին միանալու համար Հայաստանը պետք է կատարի Ղարաբաղի հետ կապված պայմանները, որոնք թելադրվում են Ռուսաստանի և եվրասիական մյուս երկրների կողմից, և որոնք բավականին ադեկվատ են: Ուստի որևէ մեկը չի փորձելու ձգձգել, պարզապես հարցը Հայաստանի կողմից որոշակի պայմանների ընդունման մասին է: Հարցն այն է, որ Հայաստանի միացումը եվրասիական պրոյեկտներին պետք է առավելագույնս անցավ լինի տարածաշրջանային անվտանգության ողջ համակարգի համար: Ռուսաստանը չի ձգձգում Հայաստանի անդամակցության գործընթացը, քանի որ դրա ջատագովն է»,- ասաց ռուսաստանաբնակ վերլուծաբանը:
Վերջինս կասկածում է, որ մինչև հուլիսի 1-ը Հայաստանը կմիանա այդ պրոյեկտներին՝ ինչպես ասել էր Նազարբաևը, քանի որ մնացել է փոքր ժամանակ, և որքան ինքն է հասկանում՝ մի շարք հարցեր դեռ համաձայնեցված չեն: «Հայաստանը վերջնարդյունքում պետք է միանա այդ պրոյեկտներին, քանի որ այլ տարբերակներ էլ, ըստ էության, չունի: Իհարկե՝ հարց է, թե ինչպես է այդ անդամակցությունը գործարկվելու, երբ չկա սահման, բայց տարբերակներ դեռ կգտնվեն»,- ասաց Գևորգ Միրզայանը:
Նա նշեց, որ կա ևս մեկ հարց, որը բավականին կտրուկ կերպով է դրված: «Անհրաժե՞շտ է արդյոք ընդլայնել այդ պրոյեկտները, անհրաժե՞շտ է արդյոք ընդլայնվել այն երկրների հաշվին, որոնք կթուլացնեն այդ ինտեգրացիոն խմբավորումը, ինչպես Հայաստանը, Ղրղըզստանը, Տաջիկստանը: Ինչպես երևում է՝ ընտրությունը կատարվել է ընդլայնման օգտին, իսկ թե դրական է դա, թե ոչ՝ ժամանակը ցույց կտա»,- ասաց Միրզայանը:
Հիշեցնենք, որ օրերս Սոչիում կայացած Եվրասիական տնտեսական հանձնաժողովի խորհրդի նիստից հետո ՌԴ առաջին փոխվարչապետ Իգոր Շուվալովը խոսել է Մաքսային միությունում առկա խնդիրների ու ԵՏՄ-ին Հայաստանի անդամակցության խոչընդոտների մասին: Նա մասնավորապես ասել է՝ եթե Հայաստանը միանա եվրասիական պրոյեկտներին, ստորագրի համաձայնագիրը, և այն վավերացվի, ապա փոխհատուցումների վերաբերյալ Հայաստանը պետք է բանակցություններ սկսի Առևտրի համաշխարհային կազմակերպության հետ, որտեղ Հայաստանը պարտավորվել է կիրառել և կիրառում է ցածր մաքսատուրքեր, իսկ դրանք իրենց հերթին տարբերվելու են Հայաստանի ՄՄ-ի շրջանակներում պարտավորություններից: Սակայն սա հայաստանյան փորձագիտական հանրության և քաղաքական գործիչներից ոմանց շրջանում որակվում է որպես պատրվակ Ռուսաստանի կողմից ձգձգելու Հայաստանի ինտեգրացիոն գործընթացը: