Հայաստանի և Ադրբեջանի նախագահների Փարիզում նախատեսվող հանդիպմանն առաջիկայում սպասել պետք չէ: «Առաջին լրատվական»-ի դիվանագիտական աղբյուրների փոխանցմամբ՝ հանդիպման ժամկետները հստակեցված չեն, և առաջիկա շաբաթների ընթացքում Փարիզում նախագահների մակարդակով հանդիպում սպասելն անիմաստ է: Ըստ նույն այդ աղբյուրների՝ հանդիպումը կազմակերպելու շուրջ բանակցությունները շարունակվում են, բայց հանդիպումը օրակարգում չէ, կա հանդիպման միայն գաղափարը, ծրագիրն ու առաջարկը:
Ըստ մեր տեղեկությունների՝ հանդիպման կայացման հարցում շահագրգռված չէ ադրբեջանական կողմը, որն, ըստ էության, չի մերժել հանդիպման առաջարկը, քանի որ այն եղել է Ֆրանսուա Օլանդի կողմից: Թերևս, պատահական չի կարելի համարել ՌԴ ԱԳ նախարար Սերգեյ Լավրովի հետ համատեղ ասուլիսի ընթացքում Ադրբեջանի ԱԳ նախարար Էլմար Մամեդյարովի հայտարարությունն այն մասին, որ Բաքուն դետալների ու հստակության է սպասում ֆրանսիական կողմից այն դեպքում, երբ ավելի վաղ Ադրբեջանում ԱՄՆ դեսպան Ռիչարդ Մորնինգսթարը նշել էր. «ԱՄՆ-ը կարծում է, որ Ադրբեջանի և Հայաստանի նախագահները փարիզյան հանդիպման ժամանակ պետք է կոնկրետ համաձայնության գան կոնֆլիկտի լուծման շուրջ», իսկ Շվեյցարիայի Համադաշնության նախագահ, արտաքին գործերի դաշնային դեպարտամենտի ղեկավար Դիդյե Բուրկհալտերը հունիսի 4-ին Երևան կատարած այցի ընթացքում հիշեցրել էր, որ Ֆրանսիայի նախագահ Ֆրանսուա Օլանդը պատրաստ է ԵԱՀԿ Մինսկի խմբի հովանու ներքո Փարիզում կազմակերպել երկու նախագահների հանդիպումը, ինչը նաև ԵԱՀԿ Մինսկի խմբի ամերիկյան համանախագահի ցանկությունն է:
Թերևս, պատահական չէ նաև այն, որ ադրբեջանական դիպուկահարները վերջերս հայկական կողմի վրա կրակում են ոչ ավանդական հենակետերից՝ Նախիջևանից, աննախադեպ հետևանքներով, պաշտոնական տվյալներով՝ երկու շաբաթվա ընթացքում չորս զոհ: Այս ուղղությունից նախկինում նման ողբերգական միջադեպեր ու ինտենսիվ կրակահերթեր չէին գրանցվել, ինչը չի բացառում, որ դա գուժում է ԼՂ հակամարտությունը ոչ բանակցային ճանապարհով կարգավորելու ադրբեջանական մտադրությունների մասին:
