«Արթիկ» քրեակատարողական հիմնարկում պատիժը կրող դատապարտյալ Արթուր Այվազյանը՝ Մանախ մականունով, այսօր առավոտից անժամկետ հացադուլ է սկսել: Նա լուրջ առողջական խնդիրներ ունի, վիրահատության անհրաժեշտություն կա, սակայն նրան չեն տեղափոխում դատապարտյալների հիվանդանոց:
«Իրեն դեռ 2 ամիս առաջ պետք է բերեին Միքայելյանի անվան վիրաբուժության ինստիտուտ: Արթուրը առողջական լուրջ խնդիրներ ունի, թոքերն են վատ: Շտապ վիրահատության կարիք ունի, բայց դիտավորյալ նրան չեն տեղափոխում հիվանդանոց»,- «Առաջին լրատվական»-ի հետ զրույցում ասաց Մանախի մորաքույրը՝ տիկին Սուսանան: Նա հավելեց, որ երկար բանակցություններից հետո Արթուրի անունը ընդգրկվել էր ցուցակում, և նրան օրերս պետք է տեղափոխեին հիվանդանոց, սակայն վերջին պահին քրեակատարողական վարչության պետ Հայկ Հարությունյանը ցուցակից հանել է Արթուրի անունը և ասել, թե նա պետք է քաղաք չմտնի: Արթուրի վիրահատությանը խոչընդոտել են նաև բուժվարչության պետ Ա. Սարկիսովը և արդարադատության նախարարության օրինականության վերահսկողության տեսչության պետ Մ. Մինասյանը:
Մորաքրոջ խոսքերով՝ Արթուրի հանդեպ այս վերաբերմունքը պայմանավորված է նրա վերջին հրապարակումներով: Մասնավորապես, երբ սկսեց պահանջել, որ հոկտեմբերի 27-ի գործով մասնագիտական հանձնաժողով կազմվի, և պատրաստակամություն հայտնեց անհրաժեշտության դեպքում ապացույցներ ներկայացնել: «Այդ հրապարակումներից հետո մարզային դատախազությունից գնացել են մոտը, խոսել են հետը, ասել են՝ թող ոչ մի բան էլ չգրվի, դու կգնաս վիրահատության, սակայն վերջին պահին վարչության պետն էլի իր արածը արել է»,- ասաց մորաքույրը՝ հավելելով, որ Արթուրը հացադուլից դուրս չի գա այնքան ժամանակ, քանի դեռ իր պահանջը չի բավարարվել, և նրան չեն տեղափոխել վիրահատության:
Նշենք, որ հացադուլի մեջ գտնվող Մանախին այսօր այցելել են նաև Մարդու իրավունքների պաշտպանի գրասենյակից: