Ղարաբաղա-ադրբեջանական հակամարտ զորքերի շփման գծի արևելյան ուղղությամբ տեղակայված զորամասերից մեկի պահպանության տեղամասի մարտական հենակետում զոհված զինծառայող Արմեն Ավետիսյանի հարազատները, ընկերները, համագյուղացիները վաղ առավոտից դատաբժշկական փորձաքննությունների կենտրոնի դիմաց սպասում են փորձաքննության արդյունքներին: Հարազատները տեսախցիկի առջև խոսելուց կտրուկ հրաժարվեցին, բայց զրույցի ընթացքում նշեցին, որ եկել են Գավառից՝ համապատասխան մարմիններից իմանալու, թե ինչ հանգամանքներում է սպանվել Արմենը:
Հարազատների հետ դատաբժշկական փորձաքննությունների կենտրոնի դիմաց են նաև պաշտպանության նախարարության աշխատակիցներ, որոնք զրուցում են, փորձում հանգստացնել մահացած զինծառայողի հարազատներին, որոնք ժամեր շարունակ հուզված պատասխանի են սպասում:
Մահացած զինծառայողը Նորադուս գյուղից էր: Նրա ընկերները «Առաջին լրատվական»-ին պատմեցին. «Նա սոցիալապես անապահով ընտանիքից էր, գյուղացիներն են միշտ օգնել՝ ով ինչով կարողացել է: Պատկերացրեք, հողի վրա, ուրիշի կիսակառույցի մեջ են ապրում»:
Ընկերները նաև պատմեցին՝ Արմենի հայրը այժմ գտնվում է կալանավայրում, մայրը վշտից տեղը չի գտնում: Արմեն Ավետիսյանը իրենից փոքր եղբայր ունի, որը հիվանդ է և օգնության կարիք ունի: Արմենի մասին ընկերները հպարտությամբ են խոսում, ասում են՝ մինչ բանակ գնալը ամեն ինչ արել է՝ հող է մշակել, օգնել համագյուղացիներին, որպեսզի չքավորության մեջ գտնվող իր ընտանիքին օգնի:
Համագյուղացիները նաև «Առաջին լրատվական»-ին պատմեցին՝ չնայած նրան, որ ընտանիքը սոցիալապես ապահով չի եղել, ոչ մի սոցիալական ծրագրից չի օգտվել: Նրանք շարունակ պնդում էին՝ բոլոր համագյուղացիների համար Արմենը որդու պես է եղել՝ կորցրել են զուսպ որդու, իսկ ընկերները՝ հավատարիմ, նվիրված ընկերոջ:
Նրանց խոսքով՝ ցավալին այն է, որ իրենց դեռևս մահվան հանգամանքները չեն հայտնում: Ընկերները խոսել են մահացած զինծառայողի հետ դեպքից ժամեր առաջ, սակայն առայժմ չեն ուզում ներկայացնել իրենց տեսակետը մահվան հանգամանքների մասին, սպասում են գործի ընթացքին:
Հիշեցնենք, որ ԼՂՀ պաշտպանության նախարարության մամուլի ծառայության տարածած հաղորդագրության համաձայն՝ երեկ Արմեն Ավետիսյանը հակառակորդի կողմից արձակված կրակոցից մահացու գնդակային վիրավորում է ստացել: