Ավան և Նոր Նորք վարչական շրջանների ընդհանուր իրավասության դատարանում Արմեն Վարդապետյանի նախագահությամբ ավարտվել է Ջոն Խալաթյանի գործի դատական քննությունը:
Ըստ մեղադրանքի՝ երկրորդ կուրսեցի 18-ամյա Ջոն Խալաթյանը 2013 թվականի նոյեմբերի 20-ին, ժամը 14-ի սահմաններում պետական ճարտարագիտական համալսարանի բակում փոխադարձ կատակների կապակցությամբ վիճաբանել է անչափահաս ուսանող Կարեն Մարգարյանի հետ:
Վերջինս ապտակել է Ջոնին:
Ջոնը, այդ ապտակից իրեն նվաստացած զգալով, գնացել է տուն, վերցրել ծալովի դանակը և դուրս եկել բակ: Նա գիտեր, որ Կարենը հաճախ է այցելում Ջրվեժի Մայակ թաղամասի այդ բակ, որտեղ նրա հորաքույրը խանութ-տաղավար ունի:
Ջոնը տաղավարի հարևանությամբ տևական ժամանակ գնացել-եկել ու սպասել է Կարենին: Երբ տեսել է նրան, կանչել է շենքի մուտք:
Կարենը գնացել է: Ժամը 16-ն անց 10 րոպեին շենքի մուտքում Ջոն Խալաթյանը կյանքից զրկելու դիտավորությամբ դանակով 2 անգամ հարվածել է անչափահաս Կարեն Մարգարյանի որովայնի առաջնային պատին:
Վիրավոր Կարեն Մարգարյանը դուրս է եկել մուտքից, վազել դեպի հորաքրոջ տաղավարն ու վայր ընկել տաղավարի հատակին: Նրան նստեցրել են աթոռին, հետո տաքսիով տեղափոխել են հիվանդանոց, բայց ստացած վերքերից Կարենը հիվանդանոցում մահացել է ժամը 17-ն անց 40 րոպեին:
Ջոն Խալաթյանին նախաքննական մարմինը մեղադրանք է առաջադրել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ընդհանուր իրավասության դատարանում Ջոն Խալաթյանը մեղսագրված արարքում իրեն մեղավոր չի ճանաչել:
Նա հայտնել է, թե տուժողին ճանաչել է որպես թաղի տղա ու իրենց համալսարանի ուսանող:
Փոխադարձ կատակներ անելու պատճառով ունեցել են տարաձայնություններ:
Դեպքի օրն ինքը սովորականի պես դասի է գնացել, հետո դուրս է եկել քայլելու, պատահաբար հանդիպել է Կարենին: Նրա հետ մի քանի անծանոթ տղաներ են եղել: Մտածել է, թե դա հարմար առիթ է Կարենի հետ հաշտվելու համար, մոտեցել է, սկսել է խոսել, բայց Կարենն իրեն նորից վիրավորել է, իրենց միջև քաշքշուկ է առաջացել: Վնասվել է իր ոտքը: Ինքը հեռացել է:
Նույն օրը իր ընկեր Աշոտի նախաձեռնությամբ համալսարանի ակումբում հանդիպել է Կարենին, հաշտվել նրա հետ, վերադարձել է տուն:
Որպեսզի տանը չհասկանան, որ ինքը կռիվ է արել, անմիջապես փոխել է շորերը:
Իջել է բակ, կանգնել է իրենց մուտքի մոտ: Ծխել է:
Այդ օրը մայրն անհանգիստ է եղել, անընդհատ զանգահարել է իրեն: Ինքն ասել է, թե գլուխը ցավում է:
Այդ ժամանակ անցել է Կարենը, իրեն տեսնելով՝ հարցրել է. «Արա՛, էս հլը սա՞ղ ես»: Նա մտել է հորաքրոջ կրպակ:
Քիչ հետո դուրս է եկել, մոտեցել իրեն, ասել, թե խոսելու բան կա: Ինքը մտածել է, թե ամեն ինչ նորմալ է, մտել է մուտք, իր հետևից մտել է նաև Կարենը: Նա ձեռքերով ուժեղ սեղմել է իր վիզը, իրեն էլ սեղմել է պատին ամրացված փոստային արկղերին:
Ինքը մեջքի հատվածում ցավ է զգացել: Ազատվելու այլ հնարավորություն չգտնելով՝ գրպանից հանել է ծալովի դանակն ու մի անգամ հարվածել Կարենին: Չի ցանկացել նրա փորին խփել: Իր նպատակը եղել է Կարենի ձեռքերից ազատվելը:
Դանակը հատուկ չի վերցրել: Այդ դանակը դեռ 8 տարեկանից իր մոտ է եղել: Ինքը միշտ այն թաքցրել է:
Հարվածից հետո Կարենը կռացել, հետո փախել է:
Ինքն էլ վախեցած է եղել, նույնպես փախել է, պատահական տաքսիով ցանկացել է հիվանդանոց գնալ, բայց գումար չի ունեցել, գնացել է Կոմիտաս՝ հոր շենքի մոտ, հորից տաքսուն վճարելու գումար է վերցրել:
Հորը պատմել է կատարվածի մասին: Հայրը բարկացել է, ինքն էլ վրդովվել ու հեռացել է:
Չի հիշում՝ դանակն ուր է գցել:
Հետո հայրը զանգել է, ինքը գնացել է նրա տան մոտ, այնտեղից իրեն տարել են ոստիկանություն:
Կատարածի համար զղջացել է, չի ցանկացել սպանել Կարենին, ցանկացել է ծանր վնասվածք պատճառել, որ կարողանա ազատվել նրա ձեռքից:
Դատարանն արժանահավատ չի համարել ամբաստանյալի ցուցմունքը:
Ըստ տուժողի հորաքրոջ՝ վնասվածք ստանալուց հետո Կարենն իրեն ասել է. «Հորքուր, ոչ մեկին չասես, Ջոնը կանչեց մուտք, միանգամից դանակով խփեց ու ասաց՝ դե գնա մեռի»:
Որ տուժողը Ջոն Խալաթյանի պարանոցը չի սեղմել, հաստատվել է դատաբժշկական փորձաքննության եզրակացությամբ, համաձայն որի՝ Ջոն Խալաթյանի պարանոցի ու գոտկային շրջաններում վնասվածքներ չեն հայտնաբերվել:
Դատարանը հաստատված է գնահատել, որ Ջոն Խալաթյանը դիտավորությամբ սպանել է անչափահաս Կարեն Մարգարյանին:
Մեղադրողը միջնորդել է Խալաթյանին դատապարտել 13 տարի ազատազրկման:
Ընդհանուր իրավասության դատարանը Ջոն Խալաթյանին մեղավոր է ճանաչել ՀՀ քրեական օրենսգրքի 104 հոդվածի 1-ին մասով և դատապարտել է 11 տարի ազատազրկման:
Պատժի սկիզբը՝ 2013 թվականի նոյեմբերի 21-ից: