Ոստիկանության անձնագրային և վիզաների վարչությունում, կառուցվածքայինից բացի, եղան նաև կադրային փոփոխություններ: Ոստիկանապետի հրահանգով, նշված վարչությունում իրականացված ստուգումներից և հայտնաբերված խախտումներից հետո վարչության պետ Նորայր Մուրադխանյանն իր երկու տեղակալների և մի շարք այլ աշխատակիցների հետ ազատվեց աշխատանքից: Փոխարենը անձնագրային և վիզաների վարչության նոր պետ նշանակվեց ոստիկանության շտաբի պետի տեղակալ, շտաբի տեսչության պետ Միշա Սարդարյանը, ով և գլխավորել էր ՕՎԻՐ-ում իրականացված ստուգումները: Օրերս էլ անձնագրային բաժնի պետ Գայանե Զարգարյանն ու Վիզաների և օտարերկրյա քաղաքացիների բաժնի պետ Արթուր Սահակյանը նշանակվել են վարչության պետի տեղակալներ: Կադրային փոփոխություններից հետո փոխոստիկանապետ, այս վարչության կուրատոր Արթուր Օսիկյանը նաև խորհրդակցություն է անցկացրել և հանձնարարականներ իջեցրել՝ լինել առավելագույնս հետևողական խախտումներն ու թերացումները վերացնելու և դրանք չկրկնելու հարցում՝ քաջ գիտակցելով, որ եթե կրկնվեն այդ խախտումները, ապա հաջորդ հեռացողը ինքն է լինելու: Վերջին փոփոխությունների հետ կապված՝ «Առաջին լրատվականը» զրուցեց Անձնագրային և վիզաների վարչության նորանշանակ պետ Միշա Սարդարյանի հետ:
-Պարոն Սարդարյան, դուք գլխավորում էիք ՕՎԻՐ-ում իրականացվող ստուգումները: Կմանրամասնե՞ք՝ ինչ խախտումներ եք հայտնաբերել և ինչու հենց ձեզ վստահվեց վարչության պետի պաշտոնը:
– Հիմնական թերությունները աշխատանքների ոչ ճիշտ կազմակերպման հետևանք էին: Ուշացվել էին դիմումների քննարկման ժամկետները և նման կարգի այլ թերություններ:
-Պարոն Սարդարյան, այդ ստուգումներից հետո կարծիք հնչեց, որ դուք, լինելով ՕՎԻՐ-ի նախկին աշխատակից, շատ լավ գիտեիք, թե որտեղ են խախտումները, և դրանք հայտնաբերելը ձեզ համար դժվար չէր: Դա՞ էր պատճառը, որ հենց ձեզ վստահվեց Մուրադխանյանի պաշտոնը:
-Այո, ես նախկինում եղել եմ անձնագրային և վիզաների վարչության պետի տեղակալ, և հաշվի առնելով, որ ես ոստիկանությունում ղեկավարել եմ, եղել եմ շտաբի պետի տեղակալ և տեսչական վարչության պետ, ապա իմ գլխավորած վարչության գործառույթի մեջ մտնում է հանրապետության տարածքային բաժինների, վարչությունների օպերատիվ, ծառայողական, կազմակերպչական գործունեության ստուգումը բոլոր տեղերում: Այնպես որ, զարմանալի ոչինչ չկա:
-Ձեր ղեկավարած վարչությունում նաև կառուցվածքային փոփոխություններ կատարվեցին: Ի՞նչ նպատակ են հետապնդում այդ փոփոխությունները, և ինչո՞ւ նորից վերադարձանք հին համակարգին:
-Այո, ոստիկանության պետը կառուցվածքային փոփոխություններ իրականացրեց, և հիմա տարածքային անձնագրային ծառայությունները երկակի ենթակայություն են ունենալու: Ենթարկվելու են տարածքային ոստիկանության բաժնի պետերին, ինչպես նաև անձնագրային և վիզաների վարչության ղեկավարությանը: Այս փոփոխությունները իրականացվեցին հսկողության համար, քանի որ տեղերում ոստիկանության բաժնի պետերը նույնպես պետք է հսկողություն իրականացնեն անձնագրային բաժինների վրա: Մեր վարչությունն այդպիսի հնարավորություններ չունի, որ լինելով Երևանում, հսկողություն իրականացնի ասենք Մեղրիում կամ Տավուշի մարզում: Իսկ այսպիսով երկնակի հսկողություն կիրականացվի: Բացի այդ, նաև քաղաքացիների սպասարկման առումով է դրական: Եթե ժամանակին քաղաքացիների դիմումներին ընթացք չտրվի, կամ այլ խնդիրներ առաջանան, ապա այսպիսով արդեն կա ղեկավար, ով պատասխանատու է առաջացած խնդիրների համար: Մենք վերլուծություն արեցինք և եկանք հետևության, որ այս համակարգն ավելի լավն է: Ճիշտ է, դա չի նշանակում, որ նախկինում ճիշտ աշխատանք չի կատարվել, բայց այս նոր մոդելն ավելի արդյունավետ կլինի: Այս մոդելն ավելի արդյունավետ կլինի նաև կոռուպցիոն ռիսկերի հետ կապված, քանի որ այսպիսով հսկողությունը, կրկնում եմ, կրկնակի է՝ ոստիկանության տարածքային բաժնի պետ և մարզային վարչության պետ:
– Ձեր նշանակումից հետո կադրային նոր փոփոխություններ կլինե՞ն անձնագրային և վիզաների վարչությունում: Ազատվելո՞ւ եք Մուրադխանյանի կադրերից և ձևավորելու ձեր թիմը:
-Այստեղ նոր թիմի հարց չկա, ես նման մոտեցումը չեմ հասկանում: Կադրային փոփոխությունները ոստիկանապետի հրամանով եղել են: Նախկինում անձնագրային և վիզաների վարչությունում երկու բաժնի պետեր նշանակվել են վարչության պետի տեղակալներ, ովքեր փորձառու մասնագետներ են: Երկուսին էլ շատ լավ ճանաչում եմ և կարող եմ ասել, որ չեմ կասկածում, որ շատ արագ անձնագրային և վիզաների վարչությունում փոփոխությունները նկատելի կլինեն: Ինչ վերաբերում է կադրային այլ փոփոխություններին, ապա այդպիսիք չեն լինի: Ով իր գործառութային պարտականությունները բարեխղճորեն կատարեց՝ կմնա իր տեղում:
– Իսկ ի՞նչ հանձնարարականներ է տվել փոխոստիկանապետ Օսիկյանը խորհրդակցության ժամանակ:
-Նա ընդգծեց, որ պետք է բարձրացնել աշխատանքային և կատարողական կարգապահությունը, քաղաքացիների գործերը, դիմումները ժամանակին քննել: Հիմնականում սա էր ասելիքը: