ՀՀՇ վարչության անդամ, Արմավիրի նախկին մարզպետ Սեդրակ Հովհաննիսյանը «Առաջին լրատվականին» փոխանցեց, որ մարտի 17-ի հանրահավաքը և մասնավորապես Ազատության հրապարակի վերանվաճումն Արմավիրի մարզի բնակիչների մոտ այն համոզումն են հիմնավորել, որ ամեն ինչ կախված է ժողովրդի քանակից:
«Վերջին հանրահավաքը դրական արձագանք է գտել մեր մարզում: Այն հուսահատ կարծիքները, որ ոչ մի փոփոխություն չի լինի, Սերժ Սարգսյանը հրաժարական չի տա, գնալով ավելի ու ավելի պակասում են: Եվ ընդհակառակը` ավելի է մեծանում ժողովրդի վստահությունը, որ ավելի մարդաշատ հանրահավաքների արդյունքում հնարավոր կլինի հասնել փոփոխությունների»,- նշեց նախկին մարզպետը:
Սեդրակ Հովհաննիսյանի համոզմամբ, ընդդիմության` Ազատության հրապարակ մտնելու հարցում դեր կատարեց ժողովրդի քանակը. «Իրենք զգացին, որ ժողովրդին դիմադրելը, հրապարակ չթողնելն անիմաստ է, քանի որ, միևնույն է, մտնելու էինք Ազատության հրապարակ, և դրանից մարդիկ ավելի կբորբոքվեին ու ավելի վճռական գործողությունների կգնային»: