Ադրբեջանական Trend գործակալությունը ներկայացրել է փորձագետների կարծիքներ` նախագահ Սահակաշվիլիի` 2013թ. վարչապետի պաշտոնը զբաղեցնելու հնարավորությունների վերաբերյալ: «Հստակ կողմնորոշված ընդդիմադիր ուժերի բացակայության պայմաններում Վրաստանի նախագահ Սահակաշվիլին լավ հնարավորություններ ունի երկիրը խորհրդրանական ժողովրդավարության տանելու», -կարծում է բրիտնական Տրանսատլանտյան ինստիտուտի տնօրեն Զիբա Նորմանը: Վրաստանի քաղաքացիների կեսից ավելին` 56 տոկոսը, պաշտպանում է Մ.Սահակաշվիլիի` վարչապետ ընտրվելու հնարավորությունը` նախագահական պաշտոնավարումից հետո: Այս հնարավորությանը բացասական պատասխան է տվել հարցվածների 29 տոկոսը: Նման տվյալները ստացվել են Gallup հետազոտական կենտրոնի հարցումների արդյունքում, որն անց է կացվել սեպտեմբերի 27-ից հոկտեմբերի 7-ը:
Փորձագետները նշում են, որ Վրաստանի Սահմանադրության փոփոխությունները, որոնք ամրապնդում են կառավարության եւ խորհրդարանի դերը, հոկտմբերի 26-ին ուղարկվել են նախագահ Սահակաշվիլիին: Օրենսդրության համաձայն` նախագահը 10 օր ունի այն ստորագրելու համար: Վրաց ընդդիմադիրները վստահեցնում են, որ նոր սահմանադրությունը նախապատրաստվել է, որպեսզի Սահակաշվիլին իր պաշտոնավարումն ավարտելուց հետո զբաղեցնի վարչապետի պաշտոնը, ում ձեռքում էլ կլինեն իշխանության հիմնական լծակները: Դիտորդների փոխանցմամբ` Սահակաշվիլին մեծ հնարավորություններ ունի պաշտոնավարման ավարտից հետո մնալու իշխանության ղեկին`, քանի որ Վրաստանի քաղաքացիները ներկա նախագահի հետ կապում են երկրում կայունությունը պահպանելու հույսերը: Նորմանի խոսքերով, «խորհրդարանական ժողովրդավարությունը կարող է ապահովել Վրաստանի համար այդքան անհրաժեշտ կայունությունը»:
