Իսրայելը չի կարող ոչնչացնել ՀԱՄԱՍ շաժումը՝ առանց Գազայի հատվածի օկուպացման, դա նշանակում է, որ ստիպված է հաշտվել իսլամիստական կազմակերպության գոյության հետ՝ կարծում է գերմանական թերթը:
Գազայի հատվածի իսլամիստական կառավարության վարչապետի նստավայրն ավերված է, ՀԱՄԱՍ-ի կարևորագույն զինվորական առաջնորդը հուղարկավորված է, իսկ ՀԱՄԱՍ-ի զինանոցներում սակավաթիվ հրթիռներ են մնացել: Իսրայելը հզոր հարված է հասցրել Գազայի հատվածի զինված իսլամիստներին, սակայն ոչ այնքան ջախջախիչ, որ նրանք հրադադարի խնդրանքով դիմեն Իսրայելին:
Օրեցօր աճում է վտանգն առ այն, որ մարտերը կարող են դուրս գալ վերահսկողությունից՝ ձեռք բերելով ուրույն դինամիկա, և դրանք կանգնեցնելը ծայրաստիճան բարդ կլինի:
Սակայն հիմա հերթական անգամ իսրայելական ղեկավարությունը, թվում է՝ զերծ մնաց օպերացիայից, որը կոչված է գլխատելու ՀԱՄԱՍ-ը: 4 տարվա վաղեմության օպերացիան ցույց տվեց, որ ցամաքային օպերացիան դեռ չի նշանակում ՀԱՄԱՍ-ի լիովին ոչնչացում: 2008-2009 թթ փորձը ցույց տվեց, որ ՀԱՄԱՍ-ին ոչնչացնելն անհնար է՝ առանց Գազայի զգալի հատվածների օկուպացման: Երբ կրակը դադարի, նկատելի կդառնա, թե այս ընթացքում ՀԱՄԱՍ-ը որքան է թուլացել, և որքանով են նրա իսլամական մրցակիցները «Իսլամական ջիհադից» և սալաֆիական խմբավորումներից կարողացել լրացնել այդ վակուումը:
Որքան էլ իսրայելական տեսանկյունից անհեթեթ հնչի, սակայն միայն ՀԱՄԱՍ-ը կարող է իսկապես հոգ տանել հրադադարի մասին, այլապես Իսրայելի հարավում կարող է նոր Սոմալի հայտնվել:
Իսրայելն այս օրերին շատ տպավորիչ կերպով ցուցադրել է իր տեխնիկական առաջատարությունը՝ հակահրթիռային պաշտպանության նոր համակարգը: Իսլամիստների արձակած հրթիռները թեև հասել էին Թել Ավիվ, սակայն ժամանակին վնասազերծվել էին: Սակայն երկարաժամկետ հեռանկարում այդ առավելությունը բավարար չէ երկրի անվտանգության երաշխավորման համար: Դրա համար պետք են հարևանների հետ կայուն հարաբերություններ, իսկ այդ հեռանկարը օրեցօր հեռանում է: