Վերահսկիչ պալատը ուսումնասիրություն է իրականացրել Երևանի քաղաքապետարանի գնումների գործընթացում՝ հայտնաբերելով մի շարք խախտումներ: Մասնավորապես, ինչպես այսօրվա ավագանու նիստում նշեց «Բարև Երևան» խմբակցության անդամ Ստյոպա Սաֆարյանը, արձանագրվել են դեպքեր, երբ նույն մատակարարը նույն ապրանքը տարբեր գներով է մատակարարել քաղաքի տարբեր վարչական շրջաններում գործող մանկապարտեզներին: «Բարև Երևան»-ին և ԲՀԿ-ին հետաքրքրում էր, թե ով և ինչպես է պատասխան տվել կատարված խախտումների համար:
Օրինակ՝ «ՏԻՍԱ» ՓԲԸ-ն, որը գրանցված է Լեռնային Ղարաբաղում, հաճարը մատակարարել է 440-720 դրամով, այն դեպքում, երբ շուկայում նվազագույն գինը կազմել է 300 դրամ, կարտոֆիլը մատակարարել է 146-220 դրամով, այն դեպքում, երբ շուկայում նվազագույն գինը կազմել է 100 դրամ, շաքարավազը մատակարարել է 435-496 դրամով, այն դեպքում, երբ շուկայում նվազագույն գինը կազմել է 372 դրամ: «Դանինի» ՍՊԸ-ն բրինձը մատակարարել է 400 և 430 դրամով, այն դեպքում, երբ շուկայում նվազագույն գինը կազմել է 328 դրամ, հնդկաձավար մատակարարել է 600 և 650 դրամով, այն դեպքում, երբ շուկայում նվազագույն գինը կազմել է 420 դրամ, կարտոֆիլը մատակարարվել է 160 և 180 դրամով, այն դեպքում, երբ շուկայում նվազագույն գինը կազմել է 100 դրամ և այլն:
Ըստ ՎՊ-ի՝ ուսումնասիրված ապրանքատեսակները պայմանագրերով նախատեսված քանակներով շուկայական միջին գներով ձեռք բերելու դեպքում «սննդի ձեռքբերում» հոդվածով հնարավոր տնտեսումը «Հատուկ կրթություն» և «Մասնագիտացված հանրակրթական ուսուցում» ծրագրերով կարող էր կազմել 46 մլն 812 հազ. դրամ:
«Նույն ապրանքը, նույն կազմակերպությունը մատակարարել է տարբեր գներով. ինչ է սա, եթե ոչ խախտման ակնհայտ ակնարկ»,- հարց բարձրացրեց Ստյոպա Սաֆարյանը:
Քաղաքապետարանի իրավաբանական վարչության պետ Զավեն Առաքելյանը հակադարձեց, որ «բոլոր գնումներն իրականացվել են բաց և մրցակցային սկզբունքով, և մրցույթների արդյուքնում են ձևավորվել այդ գները»: «Երևանի քաղաքապետարանը ձեռնարկել է համապատասխան միջոցառումներ, որ նիստում հնչած մեկնաբանությունների առիթները իսպառ վերանան: Այդ գնումներն այսօր կենտրոնացված իրականացվում են Երևանի քաղաքապետարանի կողմից, կատարվել է շուկայի վերլուծություն: Արվել է անհրաժեշտը՝ այդ խնդիրներից հետագայում զերծ մնալու համար»,- հայտարարեց Առաքելյանը՝ հավելելով, թե եղել են դեպքեր, երբ մատակարարները կրել են պատասխանատվություն, դատական գործընթաց է եղել որոշ դեպքերում, որոշ մատակարարներ հայտնվել են սև ցուցակում:
Անահիտ Բախշյանը նկատեց, որ քաղաքապետարանը ընտրովի է մոտեցել մատակարարներին. նույն կերպ աշխատած որոշ մատակարարների քաղաքապետարանը պատժել է, ոմանց՝ ոչ: «Օրինակ՝ «Տիսա» ընկերությունը նույնպես ապրանքները մատակարարել է տարբեր գներով, սակայն չի պատժվել: Հետաքրքիր է, ո՞վ է «Տիսա»-ի տերը»,- հարց բարձրացրեց Բախշյանը:
Քաղաքապետի տեղակալ Վահե Նիկոյանը հայտարարեց, թե խախտումների մասին հայտարարությունները գնումների մասին օրենքի չիմացության արդյունք են: «Կլիներ զարմանալի, որ տարբեր մանկապարտեզներ, տարբեր ժամանակում մրցույթ իրականացնելու ժամանակ ձևավորվեին նույն գները: Ես խնդրում եմ՝ նայեք՝ «Գնումների մասին» օրենքի ո՞ր կետն է խախտվել»,- հայտարարեց Նիկոյանը: Հիշեցնենք, որ խոսքը 2013 թվականի ուսումնասիրության մասին է:
Դիտեք տեսանյութը: