Լիբիայի փոխարտգործնախարար Խալեդ Քայիմը երեկ հանդես գալով հատուկ հայտարարությամբ` կոչ է արել ՄԱԿ-ին դիտորդական առաքելություն իրականացնել Լիբիայում` անաչառ գնահատականներ տալու երկրում ստեղծված իրավիճակին: Լիբիան նաև առաքելություններ ուղարկելու առաջարկներ է արել Թուրքիային, Մալթային, Հնդկաստանին և Չինաստանին: Այս մասին հաղորդում է CNN հեռուստաընկերությունը:
Հիշեցնենք, որ երեկ ՄԱԿ-ի անվտանգության խորհուրդը որոշում է կայացրել Լիբիայի օդային տարածքը փակելու, ինչպես նաև հնարավորություն տալու միջազգային ուժերին Լիբիայի բնակչության նկատմամբ բռնությունները կանխելու համար իրականացնել հատուկ գործողություններ:
Լիբիայի արտգործնախարար Մուսա Քուսան հայտարարել էր, որ Լիբիան միակողմանի դադարեցնում է հարձակումները Բենղազիի և ընդդիմության վերահսկողության տակ գտնվող մյուս քաղաքների վրա: Սակայն ինչպես փոխանցում է Al-Jazeera-ն երեկ շարունակվել է հարձակումը Բենղազիի վրա, իսկ մարտերն ընթանում են այդ քաղաքից 50 կմ հեռավորությամբ:
ՄԱԿ-ում Ֆրանսիայի ներկայացուցիչ Ժերար Արոն հայտարարել է, որ Ֆրանսիան թեպետ չի հավատում Լիբիայի հավաստիացումներին, սակայն մեկ օրով հետաձգում է ռազմական գործողությունների սկիզբը, քանի որ Փարիզում այսօր գումարվելու է դաշնակից երկրների արտգործնախարարների գագաթնաժողովը, որտեղ որոշվելու է դաշնակիցների հետագա գործողությունների ընթացքը:
