Հունիսի 20-ին հայ-ադրբեջանական սահմանագոտու հարավարևմտյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային վիրավորում ստացած ժամկետային զինծառայող, շարքային Գրիշա Մուրադի Խաչատրյանի գործի շրջանակներում ձերբակալվել է նույն զորամասի պայմանագրային զինծառայող, սերժանտ Վարդան Առաքելի Կիրակոսյանը: Վերջինս ձերբակալվել է դեպքի վայրը չպահպանելու և այն խեղաթյուրելու համար՝ ՀՀ քր. օրենսգրքի 375-րդ հոդվածի 1-ին մասով նախատեսված հանցագործություն կատարելու կասկածանքով։
Քրեական գործը հարուցվել է սպանության հատկանիշներով։
1994-ին ծնված Գրիշան Սառնակունքի բնակիչ էր, մեկ տարի է, ինչ ծառայում էր բանակում: Մինչ այդ սովորում էր ԵՊՀ պատմության ֆակուլտետում:
Երկու օր առաջ Գրիշայի դին հողին հանձնեցին, գյուղը ցնցված է կատարվածից:
Սառնակունքի գյուղապետ Մանուչար Մկրտչյանն «Առաջին լրատվական»-ի հետ զրույցում նշեց, որ երեկ հրամանատար, գեներալ Մաթևոսյանն է եկել գյուղ: «Չորս հոգով իրենց տանը զրուցել ենք ծնողների, հարազատների հետ: Եկել էր հավաստիացնելու, որ անաչառ հետաքննություն է իրականացվելու, և եթե մեղավորներ կան, պատժվելու են անպայման: Նա ձեռքի տակ որևէ փաստ դեռ չուներ, բայց հստակ էր, որ Գրիշան դիպուկահարի գնդակից չի մահացել»,- ասաց գյուղապետը:
Գրիշայի մայրը պատմել է, որ այս մեկ տարվա ծառայության ընթացքում որևէ բողոք Գրիշան չի ունեցել, ամեն ինչ հարթ է եղել, ծնողներին որևէ անգամ չի բողոքել ծառայությունից: Դեպքից մեկ օր առաջ խոսել է քրոջ հետ, ամեն ինչ նորմալ է եղել: Իսկ դեպքից մեկ ժամ հետո իջնելու էր դիրքերից:
Գրիշային բոլորն են հիշում որպես համեստ, խելացի, տղայի: Գյուղապետը պատմեց, որ իր որդու հետ Գրիշան նույն դասարանում է սովորել. «Տղայիս դասընկերն էր: Պատրաստված, աշխատասեր, խելացի… Նա կարողացավ իր աշխատասիրության շնորհիվ ընդունվել ԵՊՀ: Զինվորականներն էլ հաստատում են, որ նա իրոք գիտակից տղա էր, զինվորներին պատմության դասեր է տվել: Ամբողջ զորամասը հրամանատարի գլխավորությամբ եկել էր հրաժեշտ տալու զինվորին»,- ասաց գյուղապետը:
Հիմա Գրիշայի ծնողներն ուզում են ճշմարտությունն իմանալ, ասենք՝ զենքի կանոններին չկարողանար տիրապետել՝ լինելով մեկ տարվա ծառայող: «Առաջին լրատվական»-ի հետ զրույցում ասաց Մանուչար Մկրտչյանը:
«Իրենց զորամասում մեր համագյուղացին է ծառայում, նա զորացրվել է: Ասում է՝ չնայած Գրիշան դիրքերում է եղել, մեկ ժամ հետո պետք է իջներ դիրքերից, հերթափոխ պետք է լիներ: Տղան էլ ասում է, որ այդքան ժամանակ որևէ բողոք չի ունեցել: Այս ընթացքում արձակուրդ է եկել Գրիշան, դարձյալ ոչ մի բողոք չի ունեցել, արձակուրդ եղած ժամանակ տեսել եմ, ուրախ, զվարթ է եղել»,- ասաց գյուղապետը՝ հավելելով, որ հիմա կարևոր է, որ բացահայտվի՝ իրականում ինչ է տեղի ունեցել՝ անփութությո՞ւն, թե՞ սպանություն:
