Դոլարի փոխարժեքը վերջին 20 օրերին կայուն նվազում է արձանագրում: Եթե այս տարվա հունիսի 4-ին 1 դոլարի միջին փոխարժեքը 413.7 դրամ էր, ապա երեկ այն կազմեց 409.0 դրամ` ըստ Կենտրոնական բանկի (ԿԲ) հրապարակած տվյալների: Ավելին` վերջին երկու շաբաթներին ԿԲ-ն 6.5 մլն դոլար է գնել արտարժույթի շուկայից: Անցած շաբաթ՝ հունիսի 16-22-ը ընկած ժամանակահատվածում, ԿԲ-ն 5.6 մլն դոլար է գնել, իսկ նախանցած շաբաթ (հունիսի 9-ից 15-ին)` 900 հազար դոլար: Եթե այս դոլարը ԿԲ-ն չգներ, դոլարի կուրսի անկումը ավելի շատ կլիներ:
Դոլարի փոխարժեքը ավելի շատ նվազել (և անշան չափով աճել) է նաև նախորդ տարիների ամռան ամիսներին: Օրինակ` 2013-ի մայիսի 21-ի 417 դրամից 1 դոլարի միջին փոխարժեքը, անհամաչափ նվազելով, 2013-ի օգոստոսի 29-ին հասավ 405.9 դրամի: 2012-ի հունիսի վերջի 418 դրամից օգոստոսի վերջին այն հասավ 408 դրամի: Կամ` 2011-ի մայիսի վերջի 377.7 դրամից դոլարի միջին փոխարժեքը օգոստոսի սկզբին կազմեց 363.5 դրամ:
Սա նշանակում է, որ ամեն տարի ամռան ամիսներին հանրապետության շուկաներում դոլարի քանակությունն ավելանում է: Դրա պատճառները մի քանիսն են: Առաջին` արտաքին մասնավոր տրանսֆերտների ավելացումը, երկրորդ` վարկային միջոցների ստացման ու օգտագործման մեծ ծավալները, երրորդ` արտահանման աշխուժացումը: Կարող են լինել նաև այս գործոններից մի քանիսը կամ բոլորը միաժամանակ: Կա նաև մեկ այլ գործոն` օտարերկրյա ուղղակի ներդրումները, սակայն դրանք վերջին տարիներին կայուն նվազման միտում են դրսևորում:
Այս տարի ծավալների աճի նվազում կամ պահպանում է նկատվում նաև մասնավոր տրանսֆերտների պարագայում: Փետրվար-ապրիլ ամիսներին և՛ առևտրային փոխանցումները, և՛ ոչ առևտրային փոխանցումները կա՛մ նվազել են, կա՛մ պահպանվել անցած տարվա մակարդակի վրա: Հունիսի տվյալները դեռ չկան, սակայն դժվար թե իրավիճակը այս առումով բարելավված լինի: Ինչ վերաբերում է արտահանմանը, ապա այստեղ աշխուժացումը մեծ մասամբ գյուղմթերքների արտահանման շնորհիվ կարող է լինել: Գյուղատնտեսությունը աճի տեմպերով շարունակում է մնալ առաջատար ճյուղը նաև այս տարվա երկրորդ եռամսյակում, ինչն ակնհայտորեն կարող է ավելացնել գյուղմթերքների արտահանումը:
Այնուամենայնիվ, նախորդ տարիներին ԿԲ կողմից արտարժույթի շուկայում իրականացրած գործարքների համեմատությունը ցույց է տալիս, որ այս տարվա ամռանը դոլարի քանակությունը շուկայում ավելի քիչ է ավելացել, քան նախորդ տարիներին էր: Այսպես, այս տարվա հունիսի առաջին շաբաթվա ընթացքում, ամբողջ մայիս ամսին ու ապիլի երկրորդ կեսին ԿԲ-ն արտարժույթի շուկայում ոչ մի գործարք չի իրականացրել (ոչ ձեռք է բերել դոլար, ոչ էլ վաճառել): Ապրիլի սկզբին ԿԲ-ն նույնիսկ 3.1 մլն դոլար է վաճառել: Եվ, ինչպես արդեն նշվեց, ԿԲ-ն ձեռք է բերել 6.5 միլիոն դոլար` միայն հունիսի կեսին: Մինչդեռ անցած տարվա նույն ժամանակահատվածում` ապրիլ, մայիս և հունիս ամիսներին, ԿԲ-ն արտարժույթի շուկայից գնել է ավելի քան 20 միլիոն դոլար և վաճառքի ոչ մի գործարք, էջ 107) չի իրականացրել (: Սա նշանակում է, որ նախորդ տարվա համեմատ հանրապետությունում դոլարի քանակությունը ավելի քիչ է աճել, թեև որոշ աճ եղել է, որն էլ հանգեցրել է դոլարի արժեզրկման: Ամենայն հավանականությամբ` այս միտումը կշարունակվի նաև հուլիս ամսին (դրամը մի փոքր էլ կարժևորվի), որից հետո դոլարը կրկին կսկսի արժևորվել:
