Newsgeorgia-ի հաղորդմամբ, Վրաստանի նախագահ Միխեիլ Սաակաշվիլին ամերիկյան Բրուքինգի համալսարանում ամերիկացի փորձագետների, պետական ադմինիստրացիայի և հասարակական սեկտորի ներկայացուցիչների մասնակցությամբ ելույթի ժամանակ հայտարարել է, որ Ռուսաստանը կորցնում է վերահսկողությունը Հյուսիսային Կովկասի նկատմամբ:
«Անհնար է բռնությանը բռնությամբ հաղթել, այն անպայման կվերադառնա քեզ: Այժմ Հյուսիսային Կովկասում արդեն բավականին շատ բան է դուրս եկել վերահսկողությունից», Սաակաշվիլիի խոսքերն են մեջբերում վրացական մի շարք հեռուստաընկերություններ:
Վկայակոչելով Մեծ Բրիտանիայում 60-ականներին լույս տեսած մի քիրք`Վրաստանի նախագահը զուգահեռներ է անցկացրել 19-րդ դարի կովկասյան պատերազմների և այժմյան իրավիճակի միջև:
Ըստ այդմ` Սաակաշվիլին հիշեցրել է, թե ինչպես Նիկոլայ 1-ինը բռնությամբ փորձել է ճնշել ապստամբությունները, սակայն անհաջողության է մատնվել, և ներկայիս Ռուսաստանը հայտնվել է նմանատիպ իրավիճակում: Նրան փոխարինած Ալեքսանդր 2-րդը փորձել է լիբերալ մեթոդներով ու բարեփոխումներով հարթել կոնֆլիկտը: «Հենց դա էլ օգնել է հանգցնելու դժգոհության կրակը» ,- ընդգծել է Վրաստանի նախագահը:
