Այսօր երեկոյան՝ ընդդեմ էլեկտրաէներգիայի թանկացման ակցիայից հետո, որի ժամանակ շուրջ երեք տասնյակ ակտիվիստներ ոստիկանության կողմից բռնի ուժի կիրառման պայմաններում բերման ենթարկվեցին, ազատ արձակվածերի մի մասն ու տարբեր քաղաքացիական նախաձեռնությունների անդամներ հավաքվել էին Ազատության հրապարակում՝ որոշելու իրենց հետագա անելիքները: Ակտիվիստները քաղաքացիական նախաձեռնությունների կոնսոլիդացիայի կոչ էին անում՝ դա համարելով պայքարի միակ արդյունավետ ճանապարհը, իսկ կոնսոլիդացիայից հետո առաջարկում էին միասնական քաղաքացիական անհնազանդություն հայտարարել և դուրս գալ փողոց: «Մենք պետք է մեր առաջ խնդիր դնենք՝ զբաղվո՞ւմ ենք հանցավոր վարչախմբի հեռացմամբ, թե ոչ»։
«Դեմ եմ» նախաձեռնության ակտիվիստ Գևորգ Գեորգիսյանի խոսքերով՝ տեղի կունենա այդ կոնսոլիդացիան, որպես օրինակ՝ նա բերում է իրենց նախաձեռնության մասնակիցներին, ովքեր այս օրերին պայքարում են և կուտակային համակարգին վերաբերող նոր օրինագծի դեմ, և Աֆրիկյանների տան քանդման դեմ, իսկ այսօր արդեն նաև էլեկտրաէներգիայի թանկացման դեմ: «Եկեք չտարանջատենք: Ես՝ որպես քաղաքացի, գրեթե բլոր նախաձեռնություններում եղել եմ: Քաղաքացու պարտքն է մասնակցել այդ ամենին, դա ՀՀ քաղաքացու պարտականությունն է: Իսկ Կոնսոլիդացիան գաղափար է, և ժամանակը ցույց կտա՝ որքանով այն կյանքի կկոչվի»,- ասաց Գեորգիսյանը:
Վերլուծաբան Արգիշտի Կիվիրյանի խոսքերով էլ՝ կոնսոլիդացիան միակ ճանապարհն է: «Ժամանակը ցույց է տալիս, որ կետային պայքարի մոդելն արդեն գնում է դեպի սպառում: Կետային պայքարի դեպքում ոստիկանությունը կարողանում է բռնի ձևերով ճնշել պայքարի օջախները: Եկել է ժամանակը՝ ընտրելու պայքարի այնպիսի մեթոդներ, որ հնարավոր լինի հասնել արդյունքի և դիմակայել ոստիկանության ռեպրեսիվ մեթոդներին: Այդ պարագայում կոնսոլիդացիան միակ ճանապարհն է: Իսկ եթե դա տեղի չունեցավ, ապա Հայաստանը կշարունակի մնալ այս բռնապետական ճահճացված վիճակում»,- ասաց Արգիշտի Կիվիրյանը:
Ինչ վերաբերում է ոստիկանության այսօրվա գործողություններին, ապա մեր զրուցակցի խոսքերով՝ ոստիկանությունը վերջին շրջանում նպատակ ունի ֆիզիկապես պատժելու շարքային քաղաքացուն, ակտիվիստին: Եվ հետո, ոստիկանության բռնի գործողությունները որոշակիորեն կապված են նաև Հայաստանի՝ ՄՄ-ին անդամակցելու հետ: Եթե նախկինում նպատակ կար անդամակցելու Եվրամիությանը, ապա խնդիր կար խաղալ եվրոպական շղարշի տակ: Իսկ այսօր, երբ այլևս այդ խնդիրը չկա, և Հայաստանը բռնել է ՄՄ-ի ուղին, ապա ոստիկանությունը այլևս խնդիր չունի և բանեցնում է մեթոդներ, որոնք ավելի հարիր են Ռուսաստանին և ՄՄ անդամ մյուս բռնապետական երկրներին: Կիվիրյանի խոսքով՝ կա մեկ այլ վարկած ևս, որ շարքային ոստիկանները վերջին ամիսներին քաղաքացիների նկատմամբ բռնություններ կիրառելուց հետո ոչ միայն չեն պատժվում, այլև խրախուսվում են: Հետևաբար խնդիր է դրվել նման գործելաոճով մտնել ղեկավարի աչքը: «Ընդ որում, Վլադիմիր Գասպարյանն իր հերթին խնդիր է դրել մտնել Սերժ Սարգսյանի աչքը՝ ցույց տալով, որ ինքը կարողանում է լուծել խնդիրները»,- ասաց Կիվիրյանը:
Մանրամասները՝ տեսանյութում։
