Օրերս Իրանը և «վեցյակը» պայմանավորվեցին չեղյալ համարել Թեհրանի նկատմամբ սահմանված պատժամիջոցները, ընդ որում՝ Իրանը կկարողանա շարունակել միջուկային ծրագրի իրականացումը:
«Առաջին լրատվական»-ի հետ զրույցում Ժնևի CIMERA կենտրոնի ներկայացուցիչ, քաղաքական վերլուծաբան Վիգեն Չետերյանն ասաց, որ սա տարածաշրջանում ուժային դասավորության նոր հանգրվան է, բայց միևնույն ժամանակ տարածաշրջանը լի է հիմնահարցերով, որոնք չեն լուծվի կարճաժամկետ հեռանկարում:
Ուստի, ըստ նրա, դժվար է ասել, թե Իրանի միջուկային ծրագրի շուրջ համաձայնությունն ինչպես կանդրադառնա տարածաշրջանի վրա:
«Իրաքը, Սիրիան ու Աֆղանստանը Իրանի ամենալուրջ խնդիրներն են, այնպես որ՝ ես չեմ կարողանում հստակ տեսնել, թե ինչ նոր բեկման ականատեսը կարող ենք լինել: Իրանը ԽՍՀՄ փլուզումից հետո մեկ-երկու փորձ կատարեց՝ հասկանալու, թե կարո՞ղ է արդյոք հակամարտությունների լուծման կողմ դառնալ, միջնորդ դառնալ, մասնակցել կարգավորման գործընթացներին, սակայն այդ բոլորից պարտված դուրս եկավ և տեղ չգտավ իր համար: Կասկածում եմ, որ այսօր հաջողություն կունենա Անդրկովկասում, գոնե կարճաժամկետ հեռանկարում՝ նկատի ունենալով Իրանի բոլոր խնդիրները»,- ասաց շվեյցարաբնակ փորձագետը:
Անդրադառնալով Անդրկովկասում Իրանի հնարավոր նոր դերին՝ նա ասաց, որ պատմականորեն Ռուսաստանը և Պարսկաստանը մրցակիցներ են եղել Անդրկովկասում, այնպես որ՝ Ռուսաստանի լավ հարաբերություններն Իրանի հետ պայմանավորված են լինելու նաև նրանով, որ մրցակցություն չլինի իրենց միջև, և որ Իրանը չմիջամտի անդրկովկասյան հարցերին:
«Չեմ կարծում, որ Իրանի միջամտությունը տարածաշրջանում ընդունելի լինի Ռուսաստանի համար: Դիվանագիտության ոլորտում նորության չեմ սպասում: Իրանը մարտահրավեր չի նետի Ռուսաստանին և մյուս ուժերին, այդ երկիրը լայնածավալ խնդիրներ ունի Անդրկովկասին անցնելու համար»,- ասաց Վիգեն Չետերյանը:
Նա նշեց, որ տեղի ունեցածը մեծ հնարավորություններ է բացում հայաստանյան տնտեսության համար: Ըստ նրա՝ Հայաստանի տնտեսության համար ինչ-ինչ հեռանկարներ կբացվեն զբոսաշրջության, արտահանման ոլորտներում: «Այսինքն՝ բավական նոր հնարավորություններ կստեղծվեն, իրանահայերը ներդրումներ կանեն ՀՀ տնտեսության մեջ: Մեծ հույսեր կան»,- ասաց նա՝ հավելելով, որ դեռ վաղ է հստակ պատկերից խոսել:
