Աֆրիկյանների տան մոտ աշխատանքները վերսկսել են՝ պատճառաբանելով, թե մշակույթի նախարարության թույլտվությունը կա: Աֆրիկյանների «պահապանները» նշում են, որ կիրակի օրը մշակույթի նախարարությունը հայտարարել է աշխատանքային օր, և համապատասխան թույլտվությամբ շինարարությունը վերսկսվել է:
Սոնա Ասատրյանի խոսքով՝ իրենք դիմել են վարչական դատարան, պատասխան է ստացվել, որ համապատասխան վարույթ է ընդունվել: Աֆրիկյանների տան մոտ էր գլխավոր ճարտարապետը, որը լրագրողների և ակտիվիստների հետ մեքենայի միջից խոսելով՝ նշեց, թե կիրակի օրը խորհրդակցությանը չի մասնակցել, քանի որ մշակույթի նախարարության ներկայացուցիչը պարբերաբար հայտարարում էր, թե համապատասխան փաստաթղթերի պակաս կա:
«Առաջին լրատվական»-ը հետաքրքրվեց՝ եթե չի մասնակցել, ապա ինչպե՞ս է թույլատրվել շինարարությունը վերսկսել: Ի պատասխան՝ ճարտարապետն ասաց, որ ոչ մի պակաս փաստաթուղթ չի եղել, իսկ մշակույթի նախարարության ներկայացուցիչներին պատասխան կտա եթերով:
Մինչ գլխավոր ճարատարապետը պատասխանում էր լրագրողների հարցադրումներին, նրան մոտեցավ «Պահպանենք Աֆրիկյանների տունը» նախաձեռնության անդամ Սոնա Ասատրյանը և սկսեց բանավիճել: Գլխավոր ճարտարապետը վիրավորեց նախաձեռնության անդամին՝ նշելով, թե՝ այսպիսի սիրուն աղջիկը ինչպիսի դաստիարակություն է ստացել: Այնուհետև ակտիվիստը նստեց գլխավոր ճարտարապետի մեքենան և գնաց՝ ասելով, որ ճարտարապետի հետ խոսելու բան կա, սակայն առանց մանրամասնելու, թե ինչ, նշելով միայն, որ լուսաբանման համար չէ: