Մուսալեռում հարբած ամուսինը հարբած կնոջը «լրջացնելու» համար փոցխով ծեծել սպանել է

Արմավիրի մարզի ընդհանուր իրավասության դատարանում Արթուր Ադամյանի նախագահությամբ ավարտվել է Գրիշա Մարտիրոսյանի գործի դատական քննությունը:

36-ամյա մեծամորցի Գրիշան որպես էլեկտրիկ աշխատել է ՀԷՑ «Մուսալեռ» մասնաճյուղում, փաստացի ամուսնական հարաբերությունների մեջ է եղել արդեն հանգուցյալ Ժենյայի հետ և նրա հետ փաստացի բնակվել է Մայիսյան գյուղի Այգեգործական թաղամասի վագոն-տնակում:

Գրիշա Մարտիրոսյանը մեղավոր է ճանաչվել կնոջը սպանելու և ապօրինի ռազմամթերք պահելու համար:

Ըստ դատական ակտի՝ 2014 թվականի փետրվարի 15-ին, ժամը 23-ի սահմաններում Գրիշա Մարտիրոսյանը, ալկոհոլ օգտագործած վիճակում, կենցաղային հարցերով վիճաբանել է կնոջ՝ Ժենյայի հետ: Վագոն-տնակի բակում նա բռունցքներով, ոտքերով, մետաղական ձողով ու փոցխով բազմաթիվ հարվածներ է հասցրել կնոջ գլխին ու մարմնի այլ մասերին ու դիտավորությամբ սպանել է նրան:

Ընդհանուր իրավասության դատարանում Գրիշա Մարտիրոսյանն իրեն լիովին մեղավոր է ճանաչել:

Նա հայտնել է, թե ամուսնացած է եղելՄեծամոր քաղաքի բնակչուհի Հասմիկի հետ: 2006 թվականին ծնվել է իրենց որդին: Բայց կենցաղային տարաձայնությունների պատճառով իրենք 2009 թվականին ամուսնալուծվել են:

Ինքը դեռ 1999-2000 թվականներին Չարենցավան է գնացել-եկել՝ մորն այցելելու, ծանոթացել ու մտերմացել է Ժենյայի հետ: Սկսել են միասին ապրել:

2013 թվականի սկզբներից բնակվել են Մայիսյան գյուղի Այգեգործական թաղամասում գտնվող վագոն-տնակում: Վարել են համատեղ ամուսնական կյանք:

Սկզբում համերաշխ են եղել: Ժամանակի ընթացքում կենցաղային վեճերը հաճախացել են:

2014 թվականի փետրվարի 14-ին ինքն ու Ժենյան «Կայֆո» մականունով ծանոթի տաքսիով մեկնել են Ժենյայի քրոջ տուն՝ Առատաշեն գյուղ, և պայմանավորվել են, որ հաջորդ օրը միասին գնան ու մասնակցեն Ժենյայի քրոջ մահվան քառասունքի արարողությանը:

Ինքն ու Ժենյան գիշերել են Առատաշեն գյուղում:

Առավոտյան իրենք ու Ժենյայի քրոջ ընտանիքը մեկնել են Չարենցավան, մասնակցել են Ժենյայի երրորդ քրոջ մահվան քառասունքի արարողությանը:

Ժամը 14-ի սահմաններում գերեզմանատնից վերադարձել են, հոգեհացի սեղան նստել: Ինքն ու Ժենյան մեծ քանակությամբ օղի են օգտագործել:

Ժամը 18-ին գնացել են Չարենցավանում բնակվող իր մայրիկին այցելության: Հետո տաքսիով ուղևորվել են Առատաշեն:

Ինքը պայմանավորվել է, որ վարորդի հետ վերադառնա Չարենցավան:

Առատաշենում Ժենյայի քրոջ տուն են գնացել, կինը քրոջ հարսին խնդրել է ընթրիքի սեղան բացել: Նորից մեծ քանակությամբ ալկոհոլ են օգտագործել:

Ժամը 21-ն անց 30-ի սահմաններում ինքը ցանկացել է տաքսու վարորդի հետ Չարենցավան մեկնել, բայց կինն առարկել է, վիճել հետը, թե կասկածում է, որ ինքը սիրուհիներ ունի, նրանց մոտ է գնում:

Ժենյային դուրս է հրավիրել, հետն առանձին խոսել: Փորձել է համոզել, թե ինքը ոչ մի սիրուհի չունի, ուզում է գնալ մորը տեսնելու:

Հետո տաքսու վարորդի հետ մեկնել է Չարենցավան: Որոշ ժամանակ հետո մայրը զանգել ու ասել է, թե Ժենյան տաքսի է փնտրում, որ գա իր հետևից:

Կնոջ պահվածքից վիրավորված՝ խնդրել է տաքսու վարորդին, որ իրեն հետ տանի՝ Առատաշեն:

Այնտեղ հասնելով՝ բռնել է Ժենյայի ձեռքից, բերել-նստեցրել է մեքենա ու վարորդին պատվիրել է Մայիսյան գյուղ տանել՝ իրենց վագոն-տնակը:

Ճանապարհին Ժենյան շարունակել է ասածը պնդել՝ իբր ինքը ցանկանում էր սիրուհիների մոտ գնալ:

Ինքը զայրացել է, կնոջ մազերից բռնել, քաշել ներքև, բռունցքով երկու-երեք անգամ հարվածել նրան ու հայհոյել:

Տաքսիստն ասել է, թե իր մեքենան վիճելու և կռվելու տեղ չէ: Պահանջել է դադարեցնել վեճը:

Ժամը 23-ի սահմաններում հասել են իրենց վագոն-տնակի մոտ: Իջել է, մեքենայից քաշել-հանել է Ժենյային: Նա ընկել է գետնին:

Տաքսին հեռացել է:

Ժենյան բացել է դուռը, իրենք մտել են բակ: Ժենյան շարունակել է վիճել, ասել է, թե իրեն տաքսի է հարկավոր, ուզում է հեռանալ:
Տեսնելով, որ չի կարողանում կնոջը լռեցնել՝ սկսել է ձեռքերով ու ոտքերով հարվածներ հասցնել նրա դեմքին ու մարմնի այլ մասերին:

Ժենյան ընկել է գետնին:

Ինքը պատշգամբի սեղանի վրայից վերցրել է մետաղական ճկուն ձողը, սկսել է նրանով հարվածել կնոջը:

Այդ պահին իր համար միևնույնն էր, թե հարվածներն ինչ հետևանք կունենան:

Ժենյան դիմադրել է, ինքն ավելի է զայրացել, սկսել է ավելի ուժեղ խփել:
Վերցրել է պատշգամբում դրված փոցխը, դրա փայտե մասով է հարվածներ հասցրել Ժենյային:

Երբ Ժենյան այլևս չի դիմադրել, նրան գրկել, ներս է տարել, պառկեցրել թախտին:

Ժենյան սկսել է մի կերպ խոսել, խնդրել է, որ կանչի քրոջը: Բայց ինքը գնացել է ննջասենյակ, պառկել ու քնել է:

Մոտ մեկ ժամ անց արթնացել է, տեսել, որ Ժենյայի վիճակն ավելի է ծանրացել: Նա չի կարողացել շարժվել, անընդհատ տնքացել է: Սակայն ինքը նորից գնացել ու քնել է:

Առավոտյան արթնացել ու տեսել է, որ կինը մահացել է: Զանգել է իր մորը, կնոջ քրոջ ամուսնուն, ապա ոստիկանություն:

Դատարանում Գրիշան ժխտել է, որ հանցանքը կատարել է ալկոհոլի ազդեցության տակ: Դատարանը դա արժանահավատ չի գնահատել:

Գրիշան զղջացել է, խնդրել է իր նկատմամբ մեղմ պատիժ նշանակել:

Ժենյայի քույր Ժաննան նշել է, որ քույրը հաճախ է ալկոհոլ օգտագործել: Նման հակում է ունեցել նաև նրա ամուսինը:

Երբ զայրացած Գրիշան Ժենյային տաքսի է նստեցրել ու իր տնից տարել Մայիսյան, ինքը զանգել է նրան՝ իմանալու՝ հո չե՞ն վիճաբանում: Գրիշան ասել է, թե «դաստիարակում է» Ժենյային, նրան «հեսա կլրջացնի»:

Իրեն զանգել է Գրիշայի մայրը, խնդրել, որ գնան Մայիսյան, չթողնեն Գրիշան ու Ժենյան վիճեն: Բայց ինքը զանգել է Գրիշային, նա չի պատասխանել, ինքն էլ մտածել է, թե արդեն քնել են, դրա համար էլ չի անհանգստացել:

Առավոտյան զանգել է Գրիշան ու լաց լինելով ասել է, թե սպանել է Ժենյային: Սկզբում իրենք չեն հավատեցել: Գրիշայի մոր զանգից հետո նոր հավատացել են կատարվածին:

Ժենյայի քրոջ դուստրը հայտնել է, թե իր հայրը չի թողել, որ շփվի մորաքրոջ հետ, քանի որ նա խմիչքի նկատմամբ սեր է ունեցել, նախկինում էլ մի քանի անգամ դատապարտված է եղել:

Վերջին մի քանի ամսում շփել են Ժենյայի հետ, նա ներկայացրել է իր ամուսին Գրիշային…

Գրիշայի տան խուզարկությամբ հայտնաբերվել են ապօրինի ձեռք բերված ու պահվող փամփուշտներ, որոնք ռազմամթերք են հանդիսացել:

Ընդհանուր իրավասության դատարանը Գրիշա Մարտիրոսյանին մեղավոր է ճանաչել դիտավորյալ սպանության և ապօրինի կերպով ռազմամթերք պահելու համար և վերջին հաշվով դատապարտել է 9 տարի 6 ամիս ազատազրկման: