Հունիսի15-ին Վրաստանի մի շարք քաղաքներում, այդ թվում՝ հայաբնակ Ջավախքում, անցկացվեցին տեղական ինքնակառավարման մարմինների ընտրություններ:
Մինչ այսօր իրավիճակը կարծես չի հանդարտվում միայն Ջավախքում: Եթե Վրաստանի մյուս քաղաքներում հիմնական պայքարն ընթացավ իշխող «Վրացական երազանք» դաշինքի և Վրաստանի նախկին նախագահ Միխեիլ Սաակաշվիլիի գլխավորած «Միացյալ ազգային շարժում» կուսակցության միջև, ապա Ջավախքում պատկերը բոլորովին այլ է:
Թեպետ նախնական տվյալներով այստեղ ևս հաղթանակ է գրանցել իշխանությունը, այդուհանդերձ, «Արտախորհրդարանական ընդդիմություն» կուսակցությունների միավորումը ևս քվեների շուրջ 30 տոկոս է հավաքել. դա էլ՝ պաշտոնական տվյալներով:
«Առաջին լրատվական»-ի հետ զրույցում «Վիրք» կուսակցության նախագահ, ընդդիմադիր գործիչ Դավիթ Ռշտակյանն ասաց, որ հիմա ընթանում է քվեների վերահաշվարկ, և հնարավոր են կրկնակի ընտրություններ: Ընդդիմության առաջնորդ Կախա Կուկավան էլ երեկ քվեաթերթիկների վերահաշվարկին և մի քանի քվեատուփ բացելիս ականատես է եղել սարսափելի պատկերի: Իսկ առաջին օրը, երբ բողոքականները մտան շենք, հենց ընտրական հանձնաժողովի մեջ եղել է անվտանգության աշխատակից, որին Կուկավան ճանաչել է, հարցրել՝ դու ո՞ր կազմակերպությունից ես: Նա էլ կազմակերպության անուն է ասել, բայց երբ զանգահարել են այդ կազմակերպություն, պարզվել է, որ նման անունով մարդ գոյություն չունի՝ մի խայտառակություն էլ բացվեց»,- պատմեց Ռշտակյանը:
Նա հավելեց, որ Կուկավան պրոֆեսիոնալ իրավաբան է, պնդում է, որ կրկնակի ընտրություններն անխուսափելի են. «Լավ կլինի, որ այս ամենը հասարակական հնչեղություն ստանա, և մենք աստիճանաբար գնանք քաղաքացիական հասարակություն ստեղծելու ճանապարհով: Բավական է՝ ինչքան ազգային անվտանգությունը վերահսկեց մեր կյանքը: Այսպես չի կարելի. Սաակաշվիլու մարդիկ տեղավորվել են «Վրացական երազանք»-ում, իբրև թե ընտրվել են ու մեր կյանքն են պատրաստվում փչացնել»:
Մեր զրուցակցի խոսքով՝ պետք է վերահաշվարկ լինի բոլոր տեղամասերում, ինչից հետո կպարզվի եղելությունը․ «Մի 4-5 տեղամաս բացել են, մարդիկ տեսել են ֆեոդալական ժամանակաշրջանի խայտառակություն, մի մասը ստորագրել է 4-5 հոգու համար, եղել են կարուսելներ: Նույնիսկ եղել են տեսախցիկներ, որոնք նկարել են, թե մարդիկ ինչպես են մի քանի բյուլետեն միանգամից գցում քվեատուփ»:
