Օրերս Երուսաղեմի հայկական թաղամասում հայ և հրեա հոգևորականները կրկին բախվել են:
Արիս արքեպիսկոպոս Շիրվանյանը «Առաջին լրատվական»-ին փոխանցեց միջադեպի հետ կապված մանրամասներ: Նա նշեց, որ հրեաները լուսավորել էին փողոցները՝ իրենց Լույսի տոնին ընդառաջ, և տարբեր կողմերից հազարավոր հրեաներ են եկել Երուսաղեմ: Այդ ժամանակ մեր երկու միաբաններ երեկոյան դուրս են եկել՝ լույսերը դիտելու: Ծայրահեղական երկու հրեաներ թքել են մեր հոգևորականների կողքին, գետնին. «Կարապետ սարկավագը հրել է ծայրահեղականներից մեկին, իսկ վերջիններս ձեռքով հարվածել են նրան և Շնորհք Աբեղա Բալոյանին: Հայր Շնորհքի ակնոցն են ջարդել, դեմքը վիրավորել. սա է եղած միջադեպը, ինչն, անշուշտ, անհաճո բան է»,- ասաց Արիս սրբազանը:
Հրեաներից, սակայն, ոչ ոք չի տուժել:
Նա տեղեկացրեց, որ ոստիկանները միշտ հանցագործներին բռնում են, տանում ոստիկանատուն, տեղեկանք պատրաստում, հետո ազատ արձակում:
«Սա հակահայ երևույթ չէ, տեղի ունեցածը հակաքրիստոնեական երևույթ է: Այսպես են վարվում ոչ միայն հայ հոգևորականների, այլ նաև մյուս քրիստոնյաների նկատմամբ, ուստի սա ոչ թե հակահայ, այլ հակաքրիստոնեական դրսևորում է»,- հավելեց սրբազանը:
Նա նշեց, որ որքան էլ բողոքում են իշխանություններին, ասում, որ սա տգեղ երևույթ է և խորացնում է քրիստոնյա համայնքի և հրեա ժողովրդի միջև հակակրանքը, միևնույն է՝ ոչինչ չի փոխվում:
«Հրեաների մեջ կրոնական խորը բաժանումներ կան արդեն, բոլոր հրեաները նույն վարմունքը չունեն, շատերը պարզապես քաղաքավարի են և նման քայլի չեն դիմում: Աշխատանքներ պետք է տարվեն ծայրահեղ օրթոդոքս հրեաների դաստիարակության ուղղությամբ»,- ասաց նա՝ հավելելով, որ այսպիսի երևույթները իրենց համար արդեն այնքան սովորական են, որ բացի ոստիկանությանը բողոքելուց՝ հայտարարություններով հանդես չեն գալիս:
