Սերժ Սարգսյանն այսօր մայրաքաղաքի Դավթաշեն վարչական շրջանում ներկա է գտնվել ՀՀ ոստիկանության զորքերի նոր վարչական շենքի բացման արարողությանը: Այսօրվա միջոցառումից պարզ է դարձել, որ ոստիկանությունը ստացել է նախագահ Սարգսյանի պահանջած անհրաժեշտ չափանիշներին համապատասխան ջրցան մեքենաներ, փշալարեր, ակտիվիստներին և ցուցարարներին բերման ենթարկելու համար անհրաժեշտ բոլոր միջոցները: Ոստիկանական տեխնիկայի նոր համալրումն իսկապես կօգնի Սերժ Սարգսյանի իշխանություններին պահպանվել և վերարտադրվել բազում տարիներ:
Թե ինչ է ակնկալում ժողովուրդը ոստիկանությունից` հայտնի է վաղուց: Ժողովուրդն ակնկալում է, որ ոստիկանությունը վերջապես վերածվի օրինականության և իրավունքի բացարձակ պաշտպանի, երբ տեսնելով ոստիկանին, ոչ թե աշխատում ես նրա հետ գործ չունենալ, այլ փորձում ես հնարավորինս մոտ լինել նրան, որ անիրավներն ու անօրենները քեզ հետ գործ չունենան: Սա ակնկալիքի ընդհանրական բնորոշումն է, որը ենթադրում է իհարկե բազմաթիվ տարբեր բաղադրիչներ: Սակայն ձևավորել այդպիսի ոստիկանություն, նշանակում է ներկայիս իշխանական համակարգի տակից հանել կարևորագույն հենասյուներից մեկը: Գաղտնիք չէ, որ ոստիկանությունը Հայաստանի իշխող համակարգի վերարտադրողական ֆունկցիայի կարևոր բաղադրիչներից մեկն է, և այդպիսին դադարում է լինել, եթե ենթարկվում է որակական փոփոխության: Սակայն, մյուս կողմից, պարադոքսալ թող չթվա, ոստիկանության որակական փոփոխությունը, իսկապես հանրային շահին և օրենքին ծառայող, ոչ թե իշխանության վերարտադրության գործընթացում ֆիզիկապես և բարոյապես մաշվող ոստիկանությունը, կարող է շատ ավելի զգալի նպաստ ունենալ իշխանության շահին, քան այն, ինչ տարիներ շարունակ կատարվում է սովորականի պես: Առավել ևս, որ այդ սովորականի պեսն այժմ ակնհայտորեն սկսում է չաշխատել, լինել խնդրահարույց, առաջացնել ոչ թե հանրային վախ, այլ առավել մեծ քաղաքացիական հակազդեցություն:
Մինչդեռ որակապես իսկապես փոփոխված ոստիկանությունը կարող է լինել իշխանության վարկանիշի էական տարր: բՀետևաբար, օրենքի և իրավունքի ոստիկանության ձևավորումը առաջին հայացքից որքան ռիսկային թվա իշխանության համար, այդքան իրականում առավել շահեկան է առաջին հերթին հենց նույն իշխանության հանրային վարկանիշի համար: Հետևաբար այդ գերխնդրին պետք է մոտենալ առավել լուրջ, քան այժմ: Այդ խնդիրը, եթե կուզեք, պետք է լինի իշխանության կարևորագույն առաքելություններից մեկը, եթե կա իհարկե պահի, ժամանակի հստակ գիտակցում, արդիական ներերկրային և արտաքին գործընթացների հանդեպ ադեկվատություն:
Խնդիրն ավելի շատ, իհարկե, Սերժ Սարգսյանի հանձնարարություններն են, քանի որ պատասխանատվությունը ոստիկանության գործունեության համար, նա իր վրա է վերցրել շատ ավելի վաղ, դեռևս տարիներ առաջ, երբ հայտարարեց, որ համակարգի բարեփոխումը լինելու է իր ամենօրյա ուշադրության կենտրոնում: