Ազգային ժողովում Կուտակային կենսաթոշակների մասին օրենքում փոփոխություններ և լրացումներ կատարելու մասին օրենքի նախագծի քվեարկությունից առաջ ՀԱԿ խմբակցությունը քսան րոպե ընդմիջում խնդրեց: «Առաջին լրատվական»-ի հարցին՝ ինչ հարց կարող է լուծել այս քսան րոպե ընդմիջումը, նա պատասխանեց, թե փորձում են լուծում գտնել՝ ինչ կերպ կարող ենք թույլ չտալ՝ քվեարկությունը տեղի ունենա, եթե հաջողվեց գոնե ժամանակավորապես հետաձգել քվեարկությունը, գուցե կարողանանք ինչ-որ փոփոխություններ մտցնել: «Բայց լավատես չեմ»,- ասաց նա:
Հարցին՝ քվեարկությունից հետո պայքարի ձևերը սպառվա՞ծ է համարում, Սարգսյանը պատասխանեց. «Իհարկե ոչ, պայքարի ձևերը երբեք չեն սպառվում, հատկապես՝ եթե ժողովրդի 80 տոկոսը, ինչպես Սերժ Սարգսյանը հայտարարեց, դեմ է պարտադիր բաղադրիչին: Իրենք ավելի վատ բան են արել՝ մասնավոր և պետական հատվածներն առանձնացնելով՝ փորձել են ջլատել ուժերը»:
ՀԱԿ պատգամավորի կարծիքով՝ թիրախում հավանաբար «Դ!եմ եմ» շարժման ակտիվիստներն են, ովքեր մասնավոր սեկտորից են, մտածել են՝ գուցե արդյունքում նրանք հետ կանգնեն պայքարից: Սարգսյանը, սակայն, վստահ է՝ այդպես չի լինելու, իրենք խոսել են ակտիվիստների հետ, նրանք պատրաստ են՝ մինչև վերջ պայքարելու: «Մենք էլ իրենց կողքին կլինենք»,- ասաց նա:
