ԱԺ ՀՀԿ խմբակցության ղեկավար Վահրամ Բաղդասարյանը, «Առաջին լրատվական»-ի խնդրանքով անդրադառնալով խորհրդարանում այսօր սկիզբ առած որոշակի լարվածությանը, նշեց, թե դա զուտ աշխատանքային պրոցես է: «Պարզապես տհաճ է՝ դահլիճում բոլորը տեսնում են, էկրանը պահում են՝ 67 պատգամավոր, և հանրությանը մոլորության մեջ են գցում, դահլիճում նստած մարդկանց անտեսել և ասել՝ չեն մասնակցում, չի կարելի, իրենք շատ լավ հաշվում են էդ ամենը, ուզում են պահել (ցուցատախտակը), պահում ենք, վարկաբեկում են, ասում՝ դու կողքինիդ փոխարեն քվեարկել ես, բացում ենք՝ չի քվեարկել, բայց մարդու անունը հնչում է, չէ՞»,- նշեց նա:
Բաղդասարյանի խոսքով՝ չգրանցվելով քվորումի ապահովումը խաթարելուց հետո տեսնում են՝ այլ տարբերակ չկա, փորձում են հայհոյել, վարկաբեկել: Խմբակցության ղեկավարը նշեց, թե պատգամավորների միջև բանավեճերն ու լեզվակռիվը նորմալ է համարում, ցանկացած խորհրդարանում նման երևույթներ կան, անգամ ձեռնամարտեր են լինում, ուստի «փառք Աստծո, որ մենք կարողանում ենք միայն բանավեճերով ավարտել»: Բաղդասարյանը նշեց, թե այս հարաբերություններն իրենց անձնական հարաբերությունների վրա ազդել չեն կարող: Պատգամավորը հարգանքով չի վերաբերվում, երբ մտնում են անձնական դաշտ և վիրավորանքներ են հասցնում:
Հետաքրքրվեցինք՝ արդյոք ՀՅԴ-ի հետ հարաբերությունների լարվածության պատճառն իր՝ ՀՅԴ-ական պատգամավոր Արծվիկ Մինասյանի հասցեին հնչեցրած կոպիտ արտահայտությունը չէ, խմբակցության ղեկավարը մանրամասնեց. «Ինքը ՀԱԿ-ին չկարողացավ տանել կոնստրուկտիվ դաշտ, ՀԱԿ-ը իրեն տարավ, և նրանք դա հաջորդ օրը հաստատեցին, բայց ասում եմ՝ ամեն ինչ սկսվել է դրանից առաջ, կարծում եք՝ իրենց արտահայտությունները՝ պնդաճակատ, խաբեբա, թալանչի, կարելի՞ է անտեսել: Մարդիկ մտածում են, որ լռում են, ուրեմն համաձայն են, հետո պարզվեց, որ արհամարհելն ավելի լավ են ընդունում, քան պատասխանը, մենք ստիպված սկսեցինք որոշ հարցերի պատասխան տալ»:
Բաղդասարյանը կարծում է, որ դեպքեր կան, երբ պետք է համարժեք պատասխան տալ, ոչ թե միայն լուռ ընդունել: «Հանրապետականը միայն կուլ տալու իրավունք ունի, հա՞, չպատասխանենք որևէ բանի, հայհոյեն, մտնեն մարդկանց ընտանիքներ…»,- ասաց նա՝ հավելելով, որ իրենց ցանկությունն է՝ կարողանալ այնպես անել, որ իրենց փոխարեն երեխաները չամաչեն:
