ՀՀ նախագահ Սերժ Սարգսյանի պաշտոնական այցը Վրաստան եղել է Վրաստանում հավատարմագրված և արևմտյան, և արևելյան դեսպանների ուշադրության կենտրոնում: Ինչպես հայտնի է, հունիսի 19-ին ավարտվեց ՀՀ նախագահ Սերժ Սարգսյանի երկօրյա պաշտոնական այցը Վրաստան:
Վրաստանի նախագահ Գեորգի Մարգվելաշվիլին Հավլաբարի նստավայրում տետ-ա-տետ հանդիպում ունեցավ Սերժ Սարգսյանի հետ, ինչից հետո կողմերը հանդես եկան համատեղ հայտարարությամբ՝ կարևորելով հայ-վրացական եղբայրական հարաբերությունները: Նախագահները կարևորեցին Հայաստան-Վրաստան հարաբերությունները Հարավային Կովկասի տարածաշրջանում առկա փխրուն կայունությունն ու խաղաղությունը պահպանելու հարցում, ակտիվ քաղաքական երկխոսությունը տնտեսական համագործակցության աշխուժացման համար, ինչպես նաև հայ-վրացական միջկառավարական հանձնաժողովի և տարբեր խմբերի աշխատանքը, պայմանավորվեցին, որ պետք է ակտիվացնել այդ շփումներն ու փոխանակումները:
«Անդրադարձանք, անշուշտ, նաև Հայաստանի մասնակցությանը Եվրասիական տարածաշրջանում ծավալվող ինտեգրացիոն գործընթացներին: Մեր վրացի գործընկերներին ներկայացրինք այս ուղղությամբ արդեն իսկ կատարված աշխատանքները և հետագա ծրագրերը, մասնավորապես՝ այս համատեքստում Վրաստանի հետ փոխշահավետ տնտեսական համագործակցության հեռանկարները:
Ես խորապես վստահ եմ, որ Վրաստանը հունիսի 27-ին ստորագրելով Ասոցացման համաձայնագիրը և մաս դառնալով Ազատ առևտրի գոտու պայմանագրին՝ հնարավորություն է ստեղծում հայ գործարարների համար, որոնք տեսնում են իրենց մասնակցությունը եվրոպական շուկայում, ներդրումներ կատարել Վրաստանում, և հակառակն եմ տեսնում՝ Մաքսային միությանը Հայաստանի անդամակցելուց հետո հեռանկար է բացվում այն վրացի գործարարների համար՝ ներդրումներ կատարելու Հայաստանում, ովքեր ունեն կամ կարող են ունենալ շուկա Ռուսաստանի Դաշնությունում կամ Մաքսային միության այլ երկրներում»,- ասել է Սերժ Սարգսյանը Վրաստանում տված ասուլիսի ժամանակ:
Սերժ Սարգսյանը հունիսի 19-ի առավոտյան հանդիպեց Վրաստանի վարչապետ Իրակլի Ղարիբաշվիլիի հետ: Այդ հանդիպումներում քննարկվել են երկու երկրների համագործակցությանն առնչվող հարցեր:
Հետաքրքրականն այն է, որ, մեր տեղեկություններով, Սերժ Սարգսյանի՝ Վրաստան կատարած այցը եղել է Վրաստանում հավատարմագրված օտարերկրյա, մասնավորապես՝ արևմտյան և Չինաստանի դեսպանների ուշադրության կենտրոնում, որոնք բոլորը ներկա են գտնվել Վրաստանի նախագահ Մարգվելաշվիլիի նստավայրում Սարգսյանի ընդունելության արարողությանը, ինչը նման ընդունելությունների ժամանակ ոչ այնքան հաճախ հանդիպող երևույթ է:
Կարելի է ենթադրել, որ Հայաստանի և Վրաստանի արտաքին քաղաքական հակասող հանձնառություններն անհանգստացնում են միջազգային հանրությանը, և կա այդ հարաբերությունները նոր մակարդակի բարձրացնելու ձգտում՝ ապահովելու Եվրոպայի հետ Հայաստանի կապը Վրաստանի միջոցով:
