Այսօր Երևան ժամանած ԵԱՀԿ գործող նախագահ, Լիտվայի արտգործնախարար Աուդրոնիուս Աժուբալիսի հետ հանդիպումից անմիջապես հետո ԼՂՀ նախագահը հրավիրել էր մամուլի ասուլիս:
«Առաջին լրատվականը» նշելով, որ այսօր ՀՀ ԱԳՆ-ի շենքի դիմաց ԵԱՀԿ գործող նախագահի և ՀՀ ԱԳ նախարարի հետ հանդիպման ընթացքում ԱԳՆ-ի շենքի դիմաց ԼՂ-ից մի խումբ երիտասարդներ բողոքում էին ԵԱՀԿ նախագահին ընդդեմ Մադրիդյան սկզբունքների, Բակո Սահակյանին հարց ուղղեց, թե առհասարակ Մադրիդյան վեց` բացահայտված սկզբունքների նկատմամբ ինչպիսի՞ դիրքորոշում կա և իր`որպես ԼՂՀ նախագահի տեսակետը այդ սկզբունքների վերաբերյալ ինչպիսի՞ն է:
«Լինեն Մադրիդյան սկզբունքները կամ մյուս սկզբունքները, որոնք եղել են կամ կլինեն, անհրաժեշտություն են պարունակում, որպեսզի այդ սկզբունքները նախնական փուլում քննարկվեն նաև հիմնական կողմի հետ` Արցախի հանրապետության հետ: Այդ իսկ տեսակետից ելնելով` հարգելով ԵԱՀԿ Մինսկի խմբի առաքելությունը, միշտ նրանց մեր տեսակետը հնչեցնում ենք, և մեր դիրքորոշումը չի փոխվել`մենք գտնում ենք, որ Ղարաբաղը պիտի մասնակցի բանակցային գործընթացի բոլոր փուլերին, այդ թվում` առաջարկությունները մշակելու ժամանակաշրջանում»:
Փորձեցինք ճշտել ԼՂՀ նախագահից` Մադրիդյան սկզբունքները ղարաբաղյան կողմի հետ քննարկվե՞լ են, թե՞ ոչ. «Իհարկե` ոչ, որովհետև Արցախը չի մասնակցում բանակցային գործընթացին, հետևաբար սկզբունքները ԵԱՀԿ ՄԽ համանախագահների կողմից չեն ներակացվել պաշտոնապես Արցախի հանրապետությանը: Այլ հարց է, որ մենք, բնական է, տեղյակ ենք այդ սկզբունքներին մեր գործընկերներից` Հայաստանի իշխանություններից` Հայաստանի նախագահից, Հայաստանի արտաքին գործերի նախարարից և այլն»:
Այս պարագայում` ինչո՞ւ են ԼՂ-ի երիտասարդները բողոքում ԵԱՀԿ գործող նախագահին ընդդեմ Մադրիդյան սկզբունքների, ինչպես նաև` ԼՂ-ի մասնակցության առնչությամբ բարձրաձայնում ԵԱՀԿ-ին, այլ ոչ թե ՀՀ իշխանություններին, Բակո Սահակյանը ոչինչ չասաց:
