ՀՀԿ-ական պատգամավոր, «Բարեպաշտ սերունդ» հիմնադրամի տնօրեն Վահրամ Մկրտչյանի կողմից իր բիզնես-գործընկերոջը «քցելու» դեպքին մենք արդեն անդրադարձել ենք:
Հիշեցնենք. նա իր սանիկի՝ Պետական եկամուտների կոմիտեի ՕՀՎ բաժնի պետ Արման Սարգսյանի, վերջինիս եղբոր՝ Գուրգեն Սարգսյանի հետ անցած տարվա մայիս ամսին առևանգել էր իր բիզնես գործընկերոջը՝ ԵՊՏՀ դասախոս, գիտությունների թեկնածու Արտակ Ղուկասյանին, տարել Եղվարդ, ծեծի ենթարկել, ապա մի քանի օրվա մեջ նրանից խլել ողջ ունեցվածքը՝ սկսած բիզնեսներից, տարածքներից, վերջացրած տան գույքով: Այդ ամենից հետո էլ մեղադրյալի աթոռին հայտնվել է ոչ թե ՀՀԿ-ական պատգամավորը՝ իր թիկնազորի հետ, այլ Արտակ Ղուկասյանը՝ մեղադրվելով խարդախության համար:
Այսօր Շենգավիթի վարչական շրջանների ընդհանուր իրավասության դատարանում շարունակվել է խարդախության գործով դատական նիստը, որի ժամանակ հարցաքննվել է 28 վկաներից երկուսը: Վկաներից մեկը՝ ՊԵԿ նախկին աշխատակիցը, իր ցուցմունքի ժամանակ նշել է, որ Արտակին ճանաչում է, նրան ծեծված տեսել է, բայց չի կարող այլ մանրամասներ ասել, մասնավորապես, թե ով է ծեծել նրան:
Արտակի կնոջ՝ Գոհարի խոսքով, սակայն, այդ աշխատակցին քաջ հայտնի է դեպքի մանրամասները: Նա անգամ իր հայրական տան դիմաց օրերով հերթապահել ու հետևել է իրենց տեղաշարժին:
«Նա շատ լավ տեղյակ է դեպքի մանրամասներին, բայց հրաժարվեց խոսել: Ընդամենը կցկտուր մի-երկու բան ասաց, վախենալով ասաց, որ ծեծված տեսել է, ուրիշ ոչ մի բան»,- ասաց Գոհարը:
«Վահրամ Մկրտչյանի փաստաբանն այնտեղ նստած բոլոր տուժողներին առանձին կանչում է, խոսում հետները, աչքով-ունքով ամբողջ դատավարության ընթացքում խոսում և ուղղորդում տուժողներին»,- ասաց Արտակ Ղուկասյանի կինը՝ հավելելով, որ արդեն մի քանի նիստ է, ինչ Վահրամ Մկրտչյանը դատակոչված է, պետք է ներկայանա դատարան և հարցաքննվի, սակայն այդպես էլ նիստերին չի ներկայանում:
Դատական նիստերին քննիչի չներկայանալու պատճառաբանությամբ հետաձգվում է նաև գործից առանձնացված՝ առևանգման մասով գործի նիստերը:
Հաջորդ նիստը նշանակված է հունիսի 28-ին: