Այսօր երեկոյան Ծաղկաձորի «Գոլդեն փելես» հյուրանոցում ծայր անվտանգության պայմաններում ՀՀԿ-ն քեֆ էր կազմակերպել: Սովորաբար այս օրը կամ հինգշաբթի կայանում է ՀՀԿ գործադիր մարմնի նիստը, որը երեկ չէր կայացել, և ենթադրվում էր, որ այսօր նիստը կայանալու է Ծաղկաձորում: Բայց ինչպես ավելի ուշ պարզվեց՝ ՀՀԿ-ն իրար գլխի էր հավաքվել «մի կտոր հաց ուտելու» համար: «Մտիր ներս, սեղանը գցած ա»,- հուշում էին ՀՀԿ-ականները միմյանց:
«Առաջին լրատվական»-ը փորձեց պարզել, թե հատկապես ինչ են նշում ՀՀԿ-ականները, սակայն նրանցից ոչ ոք չբացեց փակագծերը: «Ես չգիտեմ, ինձ ասել են՝ արի, ես էլ եկել եմ»,- ասաց ԱԺ պատգամավոր Աշոտ Աղաբաբյանը: Կապի և տրանսպորտի նախարար Գագիկ Բեգլարյանն էլ նշեց, թե ԳՄ նիստ է, բայց ինքը դեռ տեղյակ չէ, թե ինչ հարցեր են քննարկվում. այնքան շտապում էր ներս մտնել, որ քիչ էր մնում՝ վայր ընկներ աստիճաններին:
Նշենք, որ ՀՀԿ-ի կերուխումը անցնում էր անվտանգության բացառիկ պայմաններում: Նախագահի թիկնազորից բացի, որը թույլ չէր տալիս անծանոթ որևէ անձի կամ ավտոմեքենայի մոտենալ հյուրանոցին, տարածքը հսկում էին մի քանի տասնյակ ոստիկաններ, որոնցից մեկն անգամ, փորձելով արգելել մեր նկարահանումը, անցավ իր լիազորությունների սահմանը: