Մեկ ամիս էլ չի անցել, որ հայ-ադրբեջանական սահմանագոտու հարավարևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կրակոցից մահացու հրազենային վիրավորում ստացան պայմանագրային զինծառայողներ Անդրանիկ Սամվելի Եղոյանը և Բորիս Բենիկի Գասպարյանը:
Այսօր հայ-ադրբեջանական սահմանագոտու հարավարևմտյան ուղղությամբ տեղակայված զորամասերի, որ հայտնի է «Գազանի պոստ» անվամբ, պահպանության տեղամասի մարտական հենակետում մահացու հրազենային վիրավորում է ստացել ժամկետային զինծառայող, շարքային Գրիշա Մուրադի Խաչատրյանը: Կրակոցները եղել են ժամը 12:00-13:00-ն ընկած ժամանակահատվածում:
Երասխավանի գյուղապետ Ռադիկ Օղիկյանը «Առաջին լրատվական»-ի հետ զրույցում նշեց, որ երկու զորամասերը իրարից գտնվում են մոտավորապես 3 կմ հեռավորության վրա, բայց նույն զորամասն են՝ նույն անձնակազմով: Զոհվածը ոչ թե պայմանագրային զինվոր է, այլ ժամկետային:
«Այսօր կրակոցներն առանձնացան հունիսի 6-ին հնչած կրակոցներից, բայց արտառոց չէին, արտառոցն այն էր, որ նորից զոհ ունեցանք»,- ասաց գյուղապետը:
Մեր այն հարցին՝ վերջին շրջանում նկատվո՞ւմ է լարվածություն, Ռադիկ Օղիկյանը նշեց, որ լարվածություն միշտ է նկատվում, այնպես չէ, որ միայն այսօր է:
«Մենք չենք հաղթել, ոչ էլ պարտվել ենք, մենք միշտ էլ կռվի մեջ ենք, ուստի ես կարող եմ մեկ բան ասել, որ այսօրվա դեպքն այնքանով էր արտառոց, որ զոհ ունեցանք, 20-ամյա տղա. շատ ցավալի է: Իսկ ինչ վերաբերում է այն հարցին՝ կրակոցները շա՞տ են, թե՞ քիչ, այսօր մի քիչ շատ էին՝ մնացած օրերի համեմատ»,- հավելեց գյուղապետը:
Նա նշեց, որ կրակոցները տևել են 5-15 րոպե, 7 կրակոց՝ 5 կրակոց, որին հաջորդել է լռությունը, որից հետո 2 կրակոց, ու վերջ:
Նա տեղեկացրեց, որ օր է լինում՝ կրակոցները լինում են մեկ-երկու հատ, բայց այսօր յոթ հատ կրակոց եղավ. «Ինքս գյուղապետարանում չէի, այդ պահին իմ տուն էի մտել, իմ տան դիմացն են հենակետերը: Ես զգացի, որ կրակոցները շատ են, հետո տեղեկացա, որ մեկ զոհ ունենք: Օր է լինում, որ ընդհանրապես կրակոց չի լինում, լինում է, որ բաց օդում 1 անորոշ կրակոց է լինում, բայց որ ամեն օր պարտադիր կրակոց լինի՝ չկա նման բան, կարող է անգամ տասն օր ընդհանրապես կրակոց չլինի, ինչը լավ բանի մասին չի հուշում»:
Նա նշեց, որ սահմանապահ գյուղի բնակիչները իրենք տեղով արդեն զինվորական են, քանի որ ապրում են սահմանամերձ Երասխ գյուղում:
Նա տեղեկացրեց, որ վերջին տասը տարիների ընթացքում իրեց մոտ սա արդեն երրորդ դեպքն էր:
Թեև լուրջ լուրջ կռիվներ չկան, բայց գյուղապետի խոսքով՝ հակառակորդը հատիկ-հատիկ մեզ մեծ կորուստներ է պատճառում: