Ամիրյան 4/4-ի բնակիչները հերթական անգամ հուսախաբ են եղել: Նրանց ապրիլ ամսին խոստացել էին հաջորդող 20 օրվա ընթացքում սկսել շինարարությունը և հաջորդ երկու ամսվա մեջ ավարտել այն, սակայն երեկ բնակիչներն այցելել են շենք և արձանագրել, որ շենքում շինարարական աշխատանքներն առհասարակ կանգնեցված են: «Մեր բարձրացրած բողոքից հետո շենքի մի հատվածում՝ 8-րդ բլոկում, շինարարկան աշխատանքներ էին սկսվել, շինանյութ էր բերվել, որ պետք է լայն թափով աշխատանքներ տարվեին, սակայն երեկ մի քանի հոգով գնացինք, և պարզվեց, որ անգամ էդ հատվածի շինարարությունն է կանգնեցվել: Բացարձակապես որևէ աշխատանք չէր կատարվում շենքում, ոչ մի բանվոր չկար»,- «Առաջին լրատվական»,-ի հետ զրույցում ասաց բնակիչներից մեկը՝ Վաչագան Թադևոսյանը՝ հավելելով, որ իրենք այլևս չգիտեն՝ ուր դիմեն, ում դիմեն, քանի որ բոլոր ատյաններն էլ պաշտպանում և հովանավորում են կատարված անօրինությունը:
Հիշեցնենք, որ Ամիրյան 4/4-ի բնակիչները փողոցում էին հայտնվել վարչապետ Հովիկ Աբրահամյանի պատճառով: Նա, տեղահան անելով նշված հասցեում ապրող բնակիչներին, տարածքը խլելով նախկին պատգամավոր հանգուցյալ Մելիք Գասպարյանից, նրանց տների տեղում կառուցեց ներկայիս Hotel National հյուրանոցային համալիրը՝ այն նվիրելով որդուն՝ Գագիկ Ծառուկյանի փեսա Արգամ Աբրահամյանին: Տարածքը վերցվել էր և բնակիչներին խոստում էին տրվել, որ հյուրանոցի հետնամասում կառուցվող շենքում նրանք բնակարաններ կստանան: Սակայն խոստումից 10 տարի անց շենքի միայն արտաքին պատերն են կանգուն:
«Նրանք մեզ լրիվ ձեռ են առել: Մարդիկ թքած ունեն, որ իրենց հաճույքների ու ագահության պատճառով 20-30 ընտանիք հայտնվել է փողոցում: Այդ մարդկանցից մի քանիսը այդպես էլ հույսները կտրած մահացան, մի մասը թողեց գնաց էս երկրից: Մի քանի հոգի ենք մնացել, վարձով ենք ապրում էն դեպքում, երբ քաղաքի կենտրոնում մենք տուն ունեինք, մեր անկյունն ունեինք, որը խլեցին մեզնից: Ու ոչ ոք էսօր չի կանգնում հասարակ քաղաքացու կողքին, բռնի նրանց ձեռքն ու ասի՝ էս ինչ եք անում, ախր մարդիկ փողոցում են, ախր շատ բան չեն ուզում, ընդամենը իրենց սեփական տունն են ուզում, որը դուք խլել եք նրանցից: Ագահությանն էլ չափ կա, չէ»,- հուսահատված բողոքեց մեկ այլ բնակիչ: