«Մեծ հաշվով աշխարհաքաղաքական խաղացողների համար Ղարաբաղյան հիմնահարց չկա: Իրենց համար կա Իրանի հետ Հայաստանի սահմանների հարց». այսպիսի տեսակետ հայտնեց Հայաստանի քաղաքագետների միության նախագահ Հմայակ Հովհաննիսյանը՝ ի պատասխան մեր հարցի, թե ի վերջո Հայաստանը կանդամակցի՞ Եվրասիական տնտեսական միությանը, թե՞ Ղարաբաղյան հարցը կարող է խոչընդոտել:
«Նրանց համար այդ խնդիրը գոյություն չունի, կա Իրանի սահմանը վերահսկելու խնդիր: Սա լուրջ հարց է»,- ասաց Հովհաննիսյանը:
Քաղաքագետի խոսքով՝ Հայաստանը կանդամակցի Եվրասիական տնտեսական միությանը, դրանից որևէ նահանջ չի լինի. «Հիշենք ժամանակին Օսկանյանի կողմից արված հայտնի արտահայտությունը՝ մի հարցրու, որ չպատասխանեմ՝ իր արտաբերված «օկուպացված տարածքների» վերաբերյալ, այսինքն՝ կան հարցեր, որ լռելյայն են լուծվում՝ աշխատանքային ներքին կարգով: Այն, որ Արցախում շրջանառության մեջ է հայկական դրամը՝ փաստ է, և այն, որ որևէ փոփոխություն այս առումով չի կարող լինել՝ նույնպես փաստ է, բայց պարտադիր չէ այդ մասին բարձրաձայնել»:
Հ. Հովհաննիսյանի դիտարկմամբ՝ Հայաստանը շատ մեծ խաղում հետ է մնացել և շարունակում է հետ մնալ. «Բուռն տեմպերով ստեղծվում է ԵՏՄ ղեկավար մարմին, ապարատ, իր ծավալով և խոշորությամբ երկրորդը՝ Եվրամիությունից հետո, իսկ Հայաստանը շարունակում է հետ մնալ այդ ամենից: Պետք է ներկա գտնվենք, ակտիվ լինենք, մեր մոտեցումները շարադրենք ու ձգտենք, որ այդ մոտեցումները կրող մարդիկ ոչ միայն հայերը լինեն: Ինչքան էլ նեղանանք այն մարդկանցից, որոնք այս գործընթացը համարում են անշրջելի, պետք է ընդունել, որ կա ընդհանրական շահերի դաշտ»:
Հարցազրույցն ամբողջությամբ՝ մեր տեսանյութում: