«Առաջին լրատվական»-ը երեկ ներկայացրել էր Էջմիածնում տեղի ունեցած կրակոցների դեպքի մանրամասները: Մասնավորապես գրել էինք, որ հրաձգությունը տեղի էր ունեցել գեներալներ Մանվել Գրիգորյանի, Սեյրան Սարոյանի եղբորոդիների և, մյուս կողմից, քրեական հեղինակություն Դոն Պիպոյի մտերիմ, Էջմիածնում քաջ հայտնի Արմանի միջև՝ վազանց կատարելու պատճառով:
Գեներալ Մանվելի եղբորորդին՝ Արայիկ Գրիգորյանը, իր մեքենայով վազանց է կատարել Արմանի մեքենային, որը կանգնեցրել էր նրա մեքենան ու վիճաբանության բռնվել գեներալի եղբորորդու հետ: Ըստ շրջանառվող նոր տեղեկությունների՝ առաջինը Արմանի մեքենայի վրա կրակել է Արայիկ Գրիգորյանը, ապա Արմանն է անցել հրազենի գործադրման, որից վիրավորվել է Սեյրան Սարոյանի եղբորորդին:
Նույն տեղեկությունների համաձայն՝ նրա վնասվածքն այնքան էլ մեծ չէ, ընդամենը քերծվածք է:
Մենք գրել էինք նաև, որ դեպքից անմիջապես հետո գերերալների մարդիկ շրջապատել էին Արմանի տունը, որտեղ նա ապրում է եղբոր ընտանիքի հետ, ու տարել Արմանի եղբոր կնոջը:
«Առաջին լրատվական»-ի տեղեկություններով՝ երեկ ուշ երեկոյան գեներալները կնոջն ազատ են արձակել պատանդի կարգավիճակից, իսկ Արմանին հաջողվել է անհետանալ Հայաստանից՝ թերևս ապաստան գտնելով իր հովանավոր Դոն Պիպոյի մոտ, որն այս պահին գտնվում է Իտալիայում: Էջմիածինցիների խոսքով, սակայն, նրանք դեռ կվերադառնան, և իրական հաշվեհարդարն այդ ժամանակ կլչինի:
Նշենք, որ դեպքի առիթով հարուցվել է քրեական գործ:Ոստիկանությունը դեպքի վայրից հայտնաբերել է 9մմ տրամաչափի 4 պարկուճ եւ 9մմ տրամաչափի չկրակված մեկ փափմուշտ: Կատարվում է նախաքննություն:
Լուսանկարը՝ shamshyan.com-ի