Թեև Ազգային ժողովում այսօր սկսվել է «Կուտակային կենսաթոշակային համակարգի մասին» օրենքի նոր նախագծի քննարկումը, դրան զուգահեռ պետական մի շարք հաստատություններում, դպրոցներում և բուհերում շարունակում են չընդունել աշխատակիցների դիմումները:
Այսօր «Առաջին լրատվական»-ի խմբագրություն էին զանգահարել Երևանի Խաչատուր Աբովյանի անվան պետական մանկավարժական համալսարանի մի քանի դասախոսներ, ովքեր բողոքում էին, որ համալսարանի ղեկավարությունը չի ընդունում կենսաթոշակային կուտակային համակարգից հրաժարվելու մասին իրենց դիմումները: Դասախոսներից մեկը, ով հասկանալի պատճառներով չցանկացավ, որ իր անունը հրապարակվի, ասաց, որ իրեն 3 օր ժամանակ են տվել՝ կամ պետք է գնա դիմումը հետ վերցնի, կամ էլ դրա հետ մեկտեղ ներկայացնի աշխատանքից ազատման դիմում: «Հիմա չգիտենք ինչ անել, մնացել ենք երկու քարի արանքում: Պարզ է, որ մեզ նման շատերը կան, ովքեր աշխատանքը չկորցնելու համար պատրաստ են հետ վերցնել այդ դիմումները: Բայց չէ՞ որ օրենքը մեզ դա թույլ է տալիս»,- դժգոհեց Մանկավարժական համալսարանի դասախոսը:
Համալսարանի ռեկտոր Ռուբեն Միրզախանյանը, սակայն, «Առաջին լրատվական»-ի հետ զրույցում հերքեց, թե նման դեպք կարող է պատահած լինել: Նրա խոսքով՝ կուտակայինից հրաժարվելու բոլոր դիմումներն ընդունվում են ի գիտություն: «Բոլոր նման դիմումները ընդունվել են: Համալսարանի ադմինիստարցիայի կողմից նման տեսակի սահմանափակումներ չկա: Բայց դրա հետ մեկտեղ պետք է ասեմ, որ այդ դիմումների քանակը շատ-շատ սակավ է: Դրանք ընդամենը հաշվարկվում են 2 տասնյակի սահմաններում»,- ասաց Ռ. Միրզախանյանը: Մեր հարցին՝ այդ դիմումների սակավությունը պայմանավորվա՞ծ է աշխատանքից հեռացման դիմումների պահանջով, ռեկտորն արձագանքեց, որ նման բան չկա, նաև բացառեց, որ հնարավոր է՝ նման դեպքեր լինեն, և ինքը տեղյակ չլինի: «Այդ դիմուները բերվում են ընդհանուր բաժին, և ես ծանոթանում եմ դրանց: Հնարավոր չէ, որ նման բան լինի»,- ասաց նա:
Հիշեցնենք, որ օրերս վարչապետ Հովիկ Աբրահամյանը, անդրադառնալով գործատուների կողմից դիմումները չընդունելուն և այդ դիմումները գրելու պատճառով մարդկանց աշխատանքից ազատելուն, ասել էր, որ «աշխատանքից կզրկվեն նրանք, ովքեր ապօրինի ազատել են ուրիշներին»: Վարչապետը թերևս լավ կանի աչքի տակ պահի նաև Մանկավարժական համալսարանը:
